Fors ko‘rfazi davlatlarida Isroil yoki Qo‘shma Shtatlar Eronning yadroviy inshootlariga zarba bersa, atrof-muhit ifloslanishi yoki qasos hujumlari ehtimoli haqida xavotir kuchaymoqda.
Ummonda messenjer foydalanuvchilari orasida yadroviy hodisa sodir bo‘lgan taqdirda nima qilish kerakligi haqida muzokaralar boshlanib ketgan. Xavfli holat yuz bersa, aholiga “yopiq va xavfsiz joyga (iloji bo‘lsa, derazasiz) kirish, barcha deraza va eshiklarni zich yopish, konditsioner va shamollatish tizimlarini o‘chirish” maslahat berilgan.
Bahraynda favqulodda vaziyatlar uchun 33 ta bombapanoh tayyorlanmoqda. Butun mamlakat bo‘ylab sirenalar sinovdan o‘tkazildi, deb xabar berdi 17-iyun kuni davlat axborot agentligi. So‘nggi haftada yadroviy falokatlar bo‘yicha xavotirlar ortib, Yaqin Sharqdagi ommaviy axborot vositalari radiatsiya sizib chiqishi bilan qanday kurashish bo‘yicha qo‘llanmalarni nashr etgan.
Bahraynlik Garvard Kennedi maktabining Yaqin Sharq tashabbusi a’zosi Elxam Faxroning aytishicha, odamlar Isroil va AQSHning Eron yadroviy obyektlariga zarba berish istiqbolidan ancha xavotirda. U birinchi navbatda, atrof-muhitning ifloslanishi, ayniqsa, suvning ifloslanishidan aholi xavotirda ekanini ta’kidlagan. Eronning Busherdagi yagona funksional atom elektr stansiyasi AQSH ittifoqchisi bo‘lgan bir qancha arab poytaxtlariga, hamda Tehronga yaqinroq joylashgan.
Uning qo‘shimcha qilishicha, boshqa xavotirlar qatoriga “Fors ko‘rfazi davlatlaridagi AQSH harbiy obyektlariga Eronning jazo choralari qo‘llashi” ehtimoli kiradi. Bu esa tinch aholiga ta’sir qilishi va havo hududining uzoq muddatga yopilishiga olib kelishi mumkin.
Eron arab qo‘shnilari bilan munosabatlari yaxshilanganiga qaramay, agar unga Amerika harbiylari tomonidan zarba berilsa, yaqin atrofdagi AQSH manfaatlarini nishonga olishi haqida yashirincha ogohlantirgan. Masalan, Bahraynda AQSH harbiy-dengiz kuchlari markaziy qo‘mondonligi joylashgan bo‘lib, u nishon bo‘lishi mumkinligi aytilgan.
Bahrayn, Quvayt, Ummon, Qatar, Saudiya Arabistoni va Birlashgan Arab Amirliklarini o‘z ichiga olgan iqtisodiy va siyosiy blok bo‘lgan Fors ko‘rfazi hamkorlik kengashi 16-iyun kuni barcha “ekologik va radiologik darajadagi zarur profilaktika choralari ko‘rilishini” ta’minlash uchun Quvaytda joylashgan Favqulodda vaziyatlarni boshqarish markazini ishga tushirgan.
BAA tashqi ishlar vaziri shayx Abdulloh bin Zoid Eron va Isroilning “chegaradan tashqariga chiqishi mumkin bo‘lgan o‘ylamasdan va noto‘g‘ri hisob-kitob qilingan harakatlari xavfidan” ogohlantirgan. Qatar tashqi ishlar vazirligi vakili, shuningdek, Fors ko‘rfazi mamlakatlari suvlariga ta’sir qilishi mumkin bo‘lgan “hisob-kitob qilinmagan” zarbalar haqida xavotir bildirgan.
Arab mamlakatlarining qariyb 60 million aholisi ichimlik, yuvinish va foydalanish uchun Fors ko‘rfazining chuchuklashtirilgan dengiz suvidan foydalanadi. Mart oyida amerikalik jurnalist Taker Karlson Qatar bosh vaziri Muhammad al-Soniyga Busherdagi atom elektr stansiyasi “portlatilsa” nima bo‘lishi haqida savol bergandi.
“Suv butunlay ifloslangan bo‘lardi... Suv yo‘q, baliq yo‘q, hech narsa yo‘q, unda hayot ham bo‘lmaydi”, degan Al Tani.
Qatar bosh vaziri o‘shanda mamlakat avvalroq Eronning shikastlangan atom elektr stansiyasi ularga qanday ta’sir ko‘rsatishi mumkinligini tahlil qilish uchun xavfli mashg‘ulotlar o‘tkazganini aytgandi.
Izoh (0)