Iroq va Ummon o‘rtasidagi Fors ko‘rfazi kubogi finali oldidan yuzaga kelgan tartibsizliklar oqibatida bir kishi halok bo‘ldi, o‘nlab muxlis jarohat olgan (video)

Fors ko‘rfazi Kubogi—2023 finalida Iroq terma jamoasi 19-yanvar, payshanba kuni Ummonga qarshi bahs olib boradi.

Basradagi uchrashuv boshlanishidan bir necha soat avval stadion atrofida minglab muxlis to‘plangan. Ularning aksariyatida chipta bo‘lmagan va ular stadionga kirishga uringan.

Natijada tartibsizliklar yuzaga kelgan, tiqilinchlar oqibatida kamida bir kishi halok bo‘lgani, 60 ga yaqin odam jarohat olgani xabar qilinmoqda.

2023-yilgi Fors ko‘rfazi Kubogiga Iroqning Basra shahri mezbonlik qilmoqda. Iroq va Ummon terma jamoalari guruh bosqichida ham o‘zaro to‘qnash kelgandi (0:0). Bu jamoa Saudiya Arabistoni va Yamanni guruhda qoldirib, yarim finalga chiqdi.

Final uchun kechgan o‘yinlarda mezbonlar Qatarni mag‘lub etdi (2:1), Ummon esa Bahrayndan ustun kelgandi (1:0).

Iroq va Ummon terma jamoalari o‘rtasidagi o‘yin O‘zbekiston vaqti bilan 21:00 da boshlanadi.