Klublar o‘rtasidagi Jahon chempionatining 1-tur uchrashuvlari davom etmoqda. 17-iyundan 18-iyunga o‘tar kechasi yana 3 ta bellashuv bo‘lib o‘tdi.
E guruhi doirasidagi bahsda Argentinaning “River Pleyt” klubi Yaponiyaning “Urava” jamoasiga qarshi bahs olib borib, 3:1 hisobida g‘alaba qozondi.
O‘yindagi hisob 12-daqiqada Buenos-Ayres klubi tomonidan ochildi. Fakundo Kolidio raqib darvozasini ishg‘ol etib, jamoasining birinchi goliga mualliflik qildi. Ikkinchi bo‘limning 48-daqiqasida KONMEBOL vakillari ikkinchi bor yaponiyaliklar darvozasini ishg‘ol qildi. Bu safar gol muallifi — Sebastyan Driussi bo‘ldi.
58-daqiqada “Urava” hisobni qisqartirdi. Yasuke Matsuo hakam tomonidan belgilangan 11 metrlik jarima zarbasini aniq amalga oshirib, tablodagi natijani 2:1 ko‘rinishiga keltirdi. 73-daqiqada esa Maksimiliano Mesa yana bir bor OFK vakillari darvozasini ishg‘ol etib, yakuniy natijani belgiladi — 3:1.
Mazkur hisob uchrashuv oxirigacha o‘zgarmadi va “River Pleyt” musobaqaning dastlabki turida 3 ochkoni qo‘lga kiritdi.
E guruhidagi ikkinchi bahs Meksikaning “Monterrey” va Italiya grandlaridan biri — “Inter” jamoalari o‘rtasida kechdi.
Hisob 25-daqiqada Serxio Ramos tomonidan ochildi. Burchak zarbasidan uzatilgan to‘pni ispaniyalik himoyachi chiroyli tarzda Yan Zommer darvozasiga yo‘lladi. 42-daqiqada esa Lautaro Martines hisobni tenglashtirdi — 1:1.
Mazkur natija o‘yin yakunigacha o‘zgarmadi va har ikkala jamoa o‘z hisobiga 1 ochkodan yozib qo‘ydi.
1-turdan so‘ng E guruhida “River Pleyt” 3 ochko bilan peshqadamlik qilayotgan bo‘lsa, “Inter” va “Monterrey” mos ravishda ikkinchi va uchinchi o‘rinlarni egallab turibdi. “Urava” esa hozircha so‘nggi pog‘onada bormoqda.
F guruhidagi bellashuvda Janubiy Koreyaning “Ulsan” jamoasi Janubiy Afrikaning “Mamelodi Sandauz” klubi bilan to‘qnash keldi. Bahs qizg‘in o‘tdi va 1:0 hisobida afrikaliklar foydasiga hal bo‘ldi.
Uchrashuvdagi yagona gol 36-daqiqada Ikrom Reyners tomonidan kiritildi.
Qo‘lga kiritilgan 3 ochkodan so‘ng “Mamelodi” F guruhida peshqadamlik qilmoqda. “Borussiya D” va “Fluminense” esa ikkinchi hamda uchinchi o‘rinlarni egallab turibdi. Ularning hisobida 1 ochkodan bor. “Ulsan” esa hozircha guruh jadvalining eng quyi pog‘onasida.
Klublar o‘rtasidagi Jahon chempionati
1-tur
E guruhi
“River Pleyt” (Argentina) — “Urava” (Yaponiya) 3:1
Gollar: 1:0 — Kolidio (12), 2:0 — Sebastyan (48), 2:1 — Yasuke (58), 3:1 — Mesa (73).
“Monterrey” (Meksika) — “Inter” (Italiya) 1:1
Gollar: 1:0 — Ramos (25), 1:1 — Martines (42).
F guruhi
“Ulsan” (Janubiya Koreya) — “Mamelodi Sandauns” (Janubiya Afrika) 0:1
Gol: 0:1 — Reyners (42).
Izoh (0)