Bundan roppa-rosa 11 yil avval, 2010-yil 11-iyun kuni Janubiy Afrika Respublikasida futbol bo‘yicha Jahon Chempionati start olgandi.
JAR va Meksika terma jamoalari o‘rtasidagi uchrashuv o‘zbekistonlik hakam Ravshan Ermatov hushtagidan keyin boshlangandi. Bu o‘zbekistonlik FIFA hakami uchun mundiallardagi debyut o‘yin edi. O‘shanda 32 yoshli Ermatov Jahon Chempionati o‘yinini boshqarga eng yosh hakamga aylangandi.
2008-yil klublar o‘rtasidagi Jahon chempionatida muvaffaqiyatli ishlagan Ermatov oradan ikki yil o‘tib, JCh—2010 ga chaqiruv oladi. Yaponiyada o‘tgan klublar o‘rtasidagi mundialda Ermatov chorak final doirasidagi “Al-Ahli” (Misr) — “Pachuka” (Meksika) va finaldan o‘rin olgan “Kito” (Ekvador) — “Manchester Yunayted” (Angliya) uchrashuvlarini boshqarib boradi. Mankunianlar himoyachisi Nemanya Vidichga ko‘rsatilgan qizil kartochka bilan yodda qolgan finalda ingliz jamoasi minimal hisobda g‘alaba qozongandi.
JCh—2010 ochilish o‘yini shubhasiz Ermatov faoliyatidagi eng muhimlaridan biri hisoblanadi. O‘yin xato va kamchiliklarsiz boshqarilganidan tashqari, 37-daqiqadagi holat ham ko‘pchilikning e’tiborini tortgani aniq: JAR jarima maydoni atrofidagi standart vaziyat vaqtida meksikaliklar qanotdan uzatilgan to‘pdan keyin hisobni ochadi. Unda darvozabon gol urgan hujumchidan oldinga o‘tib ketgan va bir qarashda ofsayd yo‘qdek edi. Biroq qanot hakami Rafael Ilyosov bayroqni ko‘tarib, o‘yindan tashqari holat qayd etilganini ko‘rsatadi. Bir lahza meksikalik futbolchilar qatori ko‘pchilik hakamlar xatoga yo‘l qo‘yganini e’tirof etadi. Ammo bu vaziyatda o‘zbekistonlik hakamlar guruhi to‘g‘ri qaror chiqargandi: gol vaqtida afrikaliklarning bir futbolchisi gol urgan o‘yinchiga nisbatan darvozaga yaqin turgandi. Futbolda kam uchraydigan bunday vaziyatda tezkor chiqarilgani oqilona qaror Ermatov guruhining obro‘yini oshirib yuboradi.
Keyinchalik Ermatov JARdagi musobaqada yana to‘rtta o‘yinga tayinlandi: Angliya — Jazoir, Gretsiya — Argentina (ikkisi guruh bosqichi), Argentina — Germaniya (1/4 final) va Urugvay — Niderlandiya (1/2 final). Bu orqali u bitta mundialning 5 ta o‘yinida ishlagan tarixdagi uch hakamning biriga aylanadi.
Braziliyada o‘tgan JCh—2014 da Ermatov to‘rtta o‘yinda ishladi: guruh bosqichida Shveysariya — Ekvador, Xorvatiya — Meksika, AQSh — Germaniya, chorak finalda Niderlandiya — Kosta-Rika.
JCh—2018 da esa o‘zbekistonlik hakam guruh bosqichida ikkita o‘yinni boshqardi: Argentina — Xorvatiya, Ispaniya — Marokash.
Ermatov Jahon Chempionatlarida 11 ta o‘yinda ishtirok etgan va bu borada mutlaq rekordchi hisoblanadi. Uning yaqin ta’qibchisi Nestor Pitana hisobida 9 ta o‘yin bor.
Ravshan Ermatov 2019-yilda hakamlik faoliyatini yakunlagan va O‘FA birinchi vitse-prezidenti etib saylangandi.
Ermatov hozirda Milliy Olimpiya qo‘mitasi raisi o‘rinbosari va O‘FA vitse-prezidenti lavozimlarida ishlab kelmoqda. Ermatov ayni vaqtda Saudiya Arabistonida markazlashgan tizimda o‘tayotgan JCh—2022 saralash bahslarida ishtirok etayotgan O‘zbekiston milliy terma jamoasi delegatsiyasi bilan bo‘lib turibdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)