“Vodil-Qadamjoy”, “Oqqiya-Akkiya” va “Chashma-Chechme” nazorat-o‘tkazish maskanlari 24 soatlik ish tartibiga o‘tkaziladi.
Bojxona qo‘mitasining xabariga ko‘ra, “Farg‘ona” chegara bojxona posti, Shohimardon qishlog‘iga o‘tishdagi “Oq qiya” bojxona punkti va “So‘x” chegara bojxona postining “Chashma” bojxona punkti 18-iyundan 24 soatlik ish rejimiga o‘tadi.
Viloyat hokimligi Farg‘ona tumanidagi “Vodil-Qadamjoy” ham 24 soatlik ishlash tartibiga o‘tishini maʼlum qildi.
Taʼkidlanishicha, mazkur chora-tadbirlar postlarda yuzaga keladigan tirbandliklarning oldini olish maqsadida joriy etilmoqda.
2024-yilning iyulida “Farg‘ona” chegara bojxona posti hamda “Oq-qiya” bojxona punkti uzluksiz ishlaydigan bo‘lgani haqida xabar berilgandi. Mazkur yangilik Shavkat Mirziyoyev va Sadir Japarovning 2024-yil 18-iyul kuni Toshkent shahridagi uchrashuvida erishilgan kelishuvlar doirasida amalga oshgandi.
Qirg‘iziston prezidentining O‘zbekistonga amalga oshirgan davlat tashrifi chog‘ida tomonlar ikkala davlat chegarasida joylashgan chegara bojxona postlaridan samarali foydalanish masalasini ko‘rib chiqqan edi.
Shundan so‘ng O‘zbekiston va Qirg‘iziston bojxona hamda chegara xizmati rahbarlari Farg‘ona viloyatidagi chegara-bojxona postlari faoliyatini birgalikda ko‘zdan kechirib, yangi bojxona postlarini tashkil etish va mavjudlaridan samarali foydalanish, bojxona postlarida tirbandliklarning oldini olish borasida mavjud imkoniyatlarni tahlil qildi.
Farg‘onada 2024-yil 12-iyul kuni Shavkat Mirziyoyev raisligida o‘tkazgan yig‘ilishda “Vodil” va “Oq-qiya” chegara o‘tkazish punktlari xalqaro maqomga ega emasligi sabab xorijiy turistlar Shohimardon va Yordonga O‘sh orqali aylanib o‘tishga to‘g‘ri kelayotgani aytilgandi.
Prezident bu borada qo‘shni mamlakat bilan tegishli muzokaralar olib borilayotganini ta’kidlab, mutasaddilarga Shohimardon va Yordon qishloqlari, Vodil shaharchasining master rejasini ishlab chiqishni topshirgandi.
Izoh (0)