Toshkent viloyatining Parkent tumanida 3 nafar bola suvga cho‘kib halok bo‘lgani haqida xabarlar tarqaldi. Bosh prokuratura matbuot kotibi Hayot Shamsutdinov buni tasdiqladi.
Uning bildirishicha, holat yuzasidan tergovga qadar tekshirish harakatlari o‘tkazildi. Tekshirishda mutasaddi tashkilotlar tomonidan Parkentsoy kanalidagi suv oqim bo‘ylab hosil bo‘lgan, chuqurligi taxminan 2 metrni tashkil etgan suv havzasida taqiqlovchi belgilar o‘rnatilmagani, aholi o‘rtasida tushuntirish ishlari olib borilmagani, yoxud su’niy tashkil topgan suv havzasini bartaraf etish choralari ko‘rilmagani aniqlandi.
Ish bo‘yicha isbotlanishi lozim bo‘lgan barcha holatlarni tekshirish hamda bir qator tergov harakatlari o‘tkazish lozimligini inobatga olib, Jinoyat kodeksining 116-moddasi (kasb yuzasidan o‘z vazifalarini lozim darajada bajarmaslik) va 207-moddasi (mansabga sovuqqonlik bilan qarash) moddalari bilan jinoyat ishi qo‘zg‘atildi.
Hayot Shamsutdinovning “Daryo” so‘roviga ko‘ra ma’lum qilishicha, cho‘kib ketgan bolalar 13, 12, 11 yoshda bo‘lgan. Barcha zarur tergov harakatlari o‘tkazilganidan so‘ng ish bo‘yicha qonuniy to‘xtamga kelinadi.
5-iyun kuni Farg‘ona viloyati Oltiariq tumanida uch nafar voyaga yetmagan bola sun’iy suv havzasiga cho‘kib ketgan edi. Hozirda prokuratura tomonidan tergovga qadar tekshirish harakatlari olib borilmoqda.
May oyining boshlarida esa Toshkentning Bo‘rijar kanaliga tushib ketgan qizlarni qutqargan erkakning o‘zi halok bo‘lgandi. Davlat rahbari marhumning rafiqasi va farzandlariga hamdardlik bildirdi va marhum Abdumannop Samiqov “Jasorat” medali bilan mukofotlandi. Mukofot uning oila a’zolariga topshirildi. Marhumning turmush o‘rtog‘iga moddiy yordam tariqasida 50 mln so‘m topshirildi.
Ayni payda Favqulodda vaziyatlar vazirligi tomonidan yoz mavsumida suvda cho‘kish holatlarining oldini olish maqsadida keng ko‘lamli profilaktik tadbirlar olib borilmoqda. Tegishli mutaxassislar ishtirokida o‘tkazilgan o‘rganishlar natijasida respublika bo‘ylab 2 004 ta cho‘milish taqiqlangan suv obyektlari aniqlanib, ular ro‘yxatga olinib, nazoratga olingan.
Izoh (0)