Germaniyaga aholining zaif qatlamiga kiruvchi Afg‘onistonning 138 nafar fuqarosi olib kelindi. Bu haqda Deutsche Welle xabar berdi.
Pokistonning Islomobod shahrida bo‘lgan muhojirlar 16-aprel kuni olib kelingan. Germaniya hukumati tomonidan ular uchun samolyot ijaraga olingan. 2025-yil boshida ham 461 nafar afg‘onistonlik xuddi shunday reyslar bilan Germaniyaga keltirilgan edi.
Mazkur shaxslar Afg‘onistonda hokimiyat tepasiga “Tolibon” kelgach, Germaniyaga kirish uchun qonuniy ruxsat olgan fuqarolardir. Ular orasida Afg‘onistondagi nemis muassasalarida ishlaganlardan tashqari, inson huquqlarini himoya qilganlari sababli “Tolibon” ta’qibiga uchraganlar ham bor.
Germaniyaga qo‘ngan samolyot bortida 45 nafar bolalar va o‘smirlar bo‘lgan. Jami 76 nafar ayol va 62 nafar erkak olib kelingan.
Germaniyaga yana 2600 nafar afg‘onistonlik kelishi kutilmoqda
Mamlakatga kirishga ruxsat berilgan yana 2600 nafar afg‘onistonlik erkak va ayollar hozirda Pokistonda. Ular Germaniyaga uchish uchun o’z reysini kutmoqda. Pokiston hukumati afg‘on qochqinlarini deportatsiya qilishni boshlagani sababli ular qiyin vaziyatga duch kelishi mumkin. Bu fuqarolar Afg‘onistonga deportatsiya qilinsa, ularning Germaniyaga borishi imkonsiz bo‘ladi.
O‘z navbatida, Germaniyadagi konservativ XDI/XSI bloki siyosatchilari afg‘onistonlik yangi qochqinlarni qabul qilishga norozilik bildirmoqda.
Izoh (0)