Birlashgan Millatlar Tashkilotining Qochqinlar bo‘yicha Oliy komissarligi 2021-yil iyun—iyul oylari holatiga ko‘ra, dunyodagi qochqin va muhojir aholi sonini ma’lum qildi, deb xabar bermoqda “Interfaks”.
Qayd etilishicha, dunyo bo‘ylab qochqin, ichki ko‘chirilgan va boshqa mamlakatdan boshpana so‘ragan aholi soni 84 million nafardan oshgan.
“Xalqaro hamjamiyat odamlar uylarini tashlab ketishga majburlayotgan zo‘ravonlik, ta’qiblar va inson huquqlari buzilishining oldini ololmayapti”, — degan BMTning Qochqinlar bo‘yicha oliy komissari Filippo Grandi.
Ma’lum bo‘lishicha, bu boradagi rekord ko‘rsatkich – 2020-yilga nisbatan 2 millionga oshgan. Xususan, 2021-yil iyul oyi boshiga kelib 26,5 million kishi qochqin maqomiga ega bo‘lgan, jumladan, 6,6 million suriyalik, 5,7 million falastinlik va 2,7 million afg‘onistonlik.
Shuningdek, dunyoda 4,4 million kishi boshpana izlovchi sifatida ro‘yxatga olingan. Birlashgan Millatlar Tashkiloti hisobotiga ko‘ra, 2021-yil iyun oyi oxiriga kelib, dunyo bo‘ylab mamlakat ichi bo‘ylab ko‘chirilganlar soni 51 millionni tashkil etgan.
Shu bilan birga, 2021-yilning birinchi yarmida Afrikada ko‘chirilganlar sonining o‘sishi kuzatilgan. Efiopiya va Kongo Demokratik respublikasidagi mojarolar ushbu mamlakatlarning har birida 1 milliondan ortiq odamni muhojir bo‘lishga majbur qilgan. Xuddi shunday muammolar Myanma, Afg‘oniston, Mozambik va Janubiy Sudanda ham kuzatilgan.
Umuman olganda, 2021-yilning yanvar — iyun oylarida 4,3 milliondan ortiq kishi ichki ko‘chirilgan maqomini oldi. Bu 2020-yilning birinchi yarmiga nisbatan 50 foizga ko‘p. Biroq 2021-yilning birinchi olti oyida salkam 1 million kishi o‘z uyiga qaytishga muvaffaq bo‘lgan.
Eslatib o‘tamiz, AQShda 2021-yil qochqinlarni qabul qilish kvotasi 15 mingdan 65 minggacha oshirilgani, keyinroq ko‘rsatkich ikki baravar oshirilib, 125 ming kishi etib belgilangani xabar qilingandi.
Izoh (0)