Germaniyada “Xristian-demokratik ittifoq” partiyasi deputati Roderix Kizevetter maktab o‘quvchilarini turli inqirozli vaziyatlarga tayyorlashga chaqirdi. Mamlakat Ichki ishlar vazirligi ham tegishli chaqiriq bilan chiqdi. Bu haqda Handesblatt xabar berdi.
Deputatning so‘zlariga ko‘ra, Germaniya maktablarida favqulodda holatlarga tayyorgarlik ko‘rish bo‘yicha maxsus bazaviy treninglar joriy etilishi kerak. Ushbu treninglarda bolalarga tabiiy ofatlar, urush yoki boshqa inqiroz paytida qanday harakat qilish kerakligi o‘rgatiladi. Bunday tizim allaqachon Finlyandiya maktablarida yo‘lga qo‘yilgani ta’kidlangan.
Favqulodda vaziyatlar uchun ssenariylarni mashq qilish juda muhim, chunki aynan bunday holatlarda o‘quvchilar eng zaif qatlam sifatida eng ko‘p azob chekishi mumkin, dedi Roderix Kizevetter.
Germaniya Ichki ishlar vazirligi ham maktablarda fuqaro mudofaasini o‘qitishni kuchaytirishga chaqirdi.
So‘nggi paytlarda xavfsizlik siyosati sohasidagi vaziyatni hisobga olgan holda, fuqaro mudofaasiga, jumladan, maktab ta’limiga ko‘proq e’tibor qaratish lozim, deydi vazirlik.
Vazirlikning ta’kidlashicha, fuqarolar favqulodda vaziyatlarga javob qaytarish uchun uyda zaruriy zaxiralarni saqlashi kerak — bu o‘ziga, oilasiga va atrofdagilarga yordam berish, zarurat tug‘ilganda esa inson hayotini saqlab qolish imkonini beradi.
Ushbu bayonotlar Yevropa komissiyasi urush, kiberhujumlar, halokatli epidemiyalar va iqlim ofatlari kabi inqirozlarning ehtimoliy ssenariylarini tavsiflovchi “Favqulodda vaziyatlarga tayyorgarlik bo‘yicha ittifoq strategiyasi”ni taqdim etganidan so‘ng yangradi. Yevrokomissiya aholini turli inqirozli ssenariylarga, jumladan, harbiy mojaroga tayyorlanishni tavsiya qildi.
Tegishli hujjatga ko‘ra, suv, dori-darmon, o‘t oldirgich (“zajigalka”), gugurt, fonar, quvvatlagichlar, issiq kiyim-kechak va sifati tez buzilmaydigan oziq-ovqat mahsulotlarini o‘z ichiga olgan minimal zaxirani yaratishga alohida e’tibor qaratish kerak. Ushbu to‘plam inson kamida 72 soat davomida o‘zgalarning yordamisiz omon qolishini ta’minlashi kerak.
Izoh (0)