AQSH prezidenti Donald Tramp 14-iyun kuni nishonlanadigan armiyaning 250 yillik yubileyi munosabati bilan katta harbiy parad o‘tkazmoqchi. Bu haqda The Hill xabar berdi.
Parad bo‘lib o‘tishi kutilayotgan kunda AQSH prezidenti 79 yoshni qarshilaydi. Parad haqida birinchi bo‘lib yozgan Washington City Paper gazetasiga ko‘ra, uning yo‘nalishi 4 milga (deyarli 6,5 kilometr) — AQSH Mudofaa vazirligining Arlington shtab-kvartirasidan Oq uygacha cho‘ziladi.
Mahalliy ma’muriyat va qurolli kuchlar vakillari The Hill va NewsNation nashrlariga bunday rejalar borligini tasdiqlagan. Biroq ular bu borada rasmiy hujjat yoki buyruq yo‘qligini ta’kidlagan. Mahalliy hokimiyat hozircha parad rejalari haqida faqat xabardor qilingan.
Tadbirni rejalashtirish 2024-yil boshlangan. Bu jarayonda Vashington hokimiyati va armiya muhandislari ishtirok etgan.
Armiya o‘zining 250 yillik yubileyini butun okrug bilan nishonlashdan juda mamnun. Biz amerikaliklar o‘z armiyasi va millati bilan faxrlanishini istaymiz. Hozircha parad bo‘lishi yoki yo‘qligi haqida gapirish uchun erta, ammo biz bayramni milliy miqyosdagi tadbirga aylantirish uchun Oq uy va bir qator hukumat idoralari bilan hamkorlik qilmoqdamiz, deydi armiya vakili polkovnik Deyv Batler.
Tramp o‘zining birinchi prezidentlik muddati davomida 2018-yilda harbiy parad o‘tkazmoqchi bo‘lgan, biroq tadbirning yuqori qiymati, taxminan, 92 million dollarga (taxminan 84 million yevro) tushishi tufayli u o‘tkazilmagan. Bundan tashqari, shahar hukumati tanklar va boshqa og‘ir zirhli texnikalar ular o‘tadigan yo‘llarga jiddiy zarar yetkazishidan xavotirda bo‘lgan. Vashingtonda 27 yil ichida birinchi yirik harbiy parad 2019-yilda bo‘lib o‘tdi. U 4-iyul AQSH Mustaqillik kuni tashkil etildi.
Izoh (0)