BMTning Jahon meteorologiya tashkiloti chorshanba kuni e’lon qilgan hisobotida ta’kidlanishicha, so‘nggi o‘n yillikda Yer harorati tarixiy yuqori cho‘qqiga yetib, atmosferadagi karbonat angidrid miqdori esa so‘nggi 800 ming yil ichidagi eng yuqori darajani qayd etgan.
Yillik hisobotda sayyoramizda kuchayib borayotgan isishning barcha alomatlari aks ettirilgan: okeanlar harorati rekord darajada isib, dengiz sathi ko‘tarilmoqda, muzliklar misli ko‘rilmagan tezlikda erimoqda.
Agentlik BMT Bosh kotibi Antoniu Guterrishning “Sayyoramiz tobora tez-tez xavf signallarini yubormoqda” degan so‘zlarini keltirgan.
BMT Jahon meteorologiya tashkilotining yillik hisoboti to‘laligicha global isish muammosiga bag‘ishlangan. Unda ta’kidlanishicha, iqlim o‘zgarishlari asosan inson faoliyati, ya’ni ko‘mir, neft va gazni qayta ishlash bilan bog‘liq. Olimlar 2024-yilni 175 yillik kuzatuvlar tarixidagi eng issiq yil sifatida qayd etishmoqda.
Hisobotda global isish ekstremal ob-havo hodisalari sonining ko‘payishiga olib kelgani, bu esa o‘z navbatida so‘nggi 16 yil ichida aholining eng yuqori migratsiya darajasini yuzaga keltirganini ko‘rsatmoqda. Bundan tashqari, u oziq-ovqat inqirozi va boshqa iqtisodiy muammolarning kuchayishiga ham sabab bo‘lgan.
BMTning xabar qilishicha, xalqaro hamjamiyatning asosiy maqsadi hamon isishni sanoatlashishdan oldingi davr (1850-1900-yillar) ko‘rsatkichlaridan 1,5 daraja selsiydan oshirmaslik bo‘lib qolmoqda. 2024-yilda bu ko‘rsatkich 1,55 darajadan oshgan. Biroq hisobotga ko‘ra bu global maqsadga erishish hali ham imkon doirasida.
BMT bosh kotibi ta’kidlaganidek, bunga erishish uchun davlat rahbarlari bir-biriga qadam tashlashi va o‘z hududlarida qayta tiklanuvchi energiya manbalaridan foydalanishni birgalikda yo‘lga qo‘yishlari lozim.
Izoh (0)