O‘zbekistonda sotilayotgan Afg‘onistonning anorli ichimligi sifat talablariga javob bermasligi aniqlandi. Bu haqda Texnik jihatdan tartibga solish sohasida nazorat inspeksiyasi “Daryo”ga maʼlum qildi.
Qayd etilishicha, inspeksiya tomonidan O‘zbekistonda ishlab chiqarilayotgan hamda import qilinayotgan mahsulotlar sifati va xavfsizligi muntazam o‘rganib kelinmoqda. Jumladan, bozorlar va savdo rastalarida sotilayotgan Royal savdo belgisi ostidagi anor sharbati mahsuloti texnik jihatdan tartibga solish sohasidagi meʼyoriy hujjatlar talabiga qay darajada mos kelishi o‘rganildi.
O‘rganish natijalariga ko‘ra, Royal savdo belgisi ostidagi anor sharbati mahsuloti tamg‘alanishi (markirovka) bo‘yicha UzTR.490-022:2017 “Oziq-ovqat mahsulotlarini tamg‘alash yuzasidan uning xavfsizligi to‘g‘risidagi umumiy texnik reglament”ining 8, 36, 53 va 58-bandlari talablariga nomuvofiqligi aniqlandi.
Akkreditlangan sinov laboratoriyasining xulosasiga ko‘ra, Royal savdo belgisi ostidagi anor sharbati mahsuloti tarkibida “Azorubin, E 122” moddasi belgilangan meʼyordan ortiq ekanligi maʼlum bo‘ldi.
Aytilishicha, UzTR.490-022:2017 “Oziq-ovqat mahsulotlarini tamg‘alash yuzasidan uning xavfsizligi to‘g‘risidagi umumiy texnik reglament”ning 36-bandiga muvofiq, tarkibida rang beruvchilar (E122 azorubin, E sariq xinolin, FCF E110 sariq “quyosh botishi”, AS E129 qizil maftunkor, 4R E124 ponso va E102 tartrazin) oziq-ovqat mahsulotlari uchun “Tarkibida rang beruvchi (rang beruvchilar) mavjud, ular bolalarning faolligiga va diqqatiga salbiy taʼsir ko‘rsatishi mumkin” degan ogohlantiruvchi yozuv yozilishi kerak.
Yuqoridagilarni inobatga olgan holda, O‘zbekistonning “Texnik jihatdan tartibga solish to‘g‘risida”gi, “Standartlashtirish to‘g‘risida”gi, “Metrologiya to‘g‘risida”gi, “Isteʼmolchilarning huquqlarini himoya qilish to‘g‘risida” gi qonunlari va texnik jihatdan tartibga solish sohasidagi normativ hujjatlar talablarini bajarmaslik qonun buzilishiga olib kelishi ogohlantirildi.
Izoh (1)
Qaysidir maxsulot yaxshi ko'tarilsa va boshqalarini reytingini tushirsa birdan uni sindirish uchun ogohlatirish chiqariladi, chunki boshqalarni nonini yarimta qiladida. Har doimgi yolg'on bu, men ishonmayman mutlaqo bunga. Undan kura energetik ichimliklarni yo'qotishsin ana o'shalar turgani zarar. Bu oddiy anor suvi zararsiz. Kimnidir biznesini o'ldirish ketini kovlab sindirish buyicha faol turishadi doim.