Qozog‘istonda savdo subyektlarining barchasi tarozilar to‘g‘riligi bo‘yicha yillik majburiy tekshiruvdan o‘tkaziladi, deb xabar bermoqda Informburo. Qozog‘iston Savdo va integratsiya vazirligining xabar berishicha, diagnostika butun mamlakat bo‘ylab mavjud bo‘lgan akkreditatsiyalangan tekshiruv laboratoriyalarida sertifikatlangan mutaxassislar tomonidan amalga oshiriladi.
Avval Qozog‘istonda tekshirish talabi faqat sotilgan tovarlarning geometrik parametrlarini, masalan, uzunlikni o‘lchaydigan qurilmalarga nisbatan qo‘llangan. Biroq bu talab endi tijoriy tarozilariga ham tegishli bo‘ladi.
“Ushbu tekshirish o‘lchov vositalarining majburiy metrologik talablarga muvofiqligini tasdiqlash uchun mo‘ljallangan. Shu maqsadda turli tadbirlarni o‘z ichiga olgan sertifikatlangan tekshirish metodologiyasi qo‘llanadi. Muvaffaqiyatli tekshirish natijalari rasmiy tekshirish sertifikati bilan, muvaffaqiyatsiz bo‘lganlar esa o‘lchov vositasining yaroqsizligi to‘g‘risidagi bildirishnoma bilan tasdiqlanadi”, — deyiladi Qozog‘iston Savdo vazirligi xabarida.
Vazirlik ta’kidlashicha, ushbu protsedura xarajatlari 5 ming tengedan (10,5 dollar) oshmaydi. Tadbirkorlar talabni bajarmasa, Ma’muriy javobgarlik to‘g‘risidagi kodeksda nazarda tutilgan jarimaga tortilishi haqida ogohlantirilmoqda. Jismoniy shaxslarga (218 dollar) ham, yuridik shaxslarga ham (1600 dollardan 4350 dollargacha) jarimalar qo‘llanadi.
“Har kuni butun mamlakat bo‘ylab iste’molchilar xarid qilishda har xil turdagi va sharoitlardagi tarozilarga tayanadi, ko‘pincha tasdiqlanmagan o‘lchov natijalari uchun pul to‘laydi. Natijada fuqarolarning shikoyatlari kelib chiqadi. Bo‘lajak tekshiruv tarozilarning to‘g‘riligini ta’minlaydi, iste’molchilarni himoya qiladi va firibgarlik holatlarini kamaytiradi”, — dedi Texnik jihatdan tartibga solish va metrologiya qo‘mitasi raisi Kuanish Elikboyev.
Qozog‘iston Savdo va integratsiya vazirligi bu yangilik qishloq xo‘jaligi yarmarkalariga taalluqli emasligini ta’kidladi.
Izoh (0)