Kongo Demokratik Respublikasining sharqida 4-may kuni terakt uyushtirilishi oqibatida kamida 12 nafar fuqaro halok bo‘lgan. Bu haqda Al Jazeera nashri xabar berdi.
Manbada aytilishicha, terakt mamlakat sharqiy qismidagi ko‘chirilganlar lagerida yuz bergan. Kongo hukumati va mamlakatdagi AQSH rasmiylari Ruanda armiyasi va M23 isyonchi guruhini teraktni uyushtirishda ayblagan.
Hujumlar lagerning ikkita hududida sodir etilgani aytilgan. Portlash hududning asosan ayollar va bolalar istiqomat qiladigan qismlarida yuz bergan.
Terakt yuz bergan Shimoliy Kivu provinsiyasi hududida xavfsizlik choralari kuchaytirilgan. Goma shahri yaqinidagi Lak Vert va Mugunga lagerlari hududiga xavfsizlik otryadlari kiritilgan.
Mamlakat rasmiylari kamida 20 kishi yaralanganini bildirishgan. Hujumlar inson huquqlari va xalqaro gumanitar huquqning qo‘pol ravishda buzilishi va urush jinoyati ekanligi aytilgan.
Lagerlardan birida istiqomat qiluvchi Al Jazeera muxbirining aytishicha, hududga hujum qilinganda qurbonlarning ko‘pchiligi o‘z chodirlarida uxlayotgan bo‘lgan.
4-may kuni Ruanda hukumati mamlakatning teraktga aloqadorligi borasidagi ayblovga munosabat bildirirb, buni bemaʼnilik deb atagan. Ruanda hukumati matbuot kotibi Yolande Makolo mamlakat mudofaa kuchlari hech qachon ko‘chirilgan fuqarolarga hujum qilmaydigan “professional armiya” ekanligini bildirgan.
Manbada aytilishicha, hozirda Kongo Demokratik Respublikasiga qarashli Shimoliy Kivu hududining katta qismini M23 isyonchi guruhi egallab olgan. Ammo so‘nggi haftalarda ularning qochqinlar lageriga hujumi kuzatilmayotgani bildirilgan.
BMT va G‘arb davlatlari Ruanda konlar va mineral resurslarni nazorat qilish maqsadida M23 isyonchi guruhini qo‘llab-quvvatlashini maʼlum qilgan. Ruanda bu ayblovni ham rad etgan.
Izoh (0)