Руанда ҳукумати Бельгия билан дипломатик муносабатларни узиб, қиролликнинг барча дипломатларига 48 соат ичида мамлакатни тарк этишни буюрди. Бу ҳақда Руанда Ташқи ишлар вазирлиги маълум қилди.
“Руанда ҳукумати бугун Бельгия ҳукуматини дипломатик муносабатларни узиш тўғрисидаги қарори ҳақида хабардор қилди. Руанданинг бу қарори бир қанча омилларни синчковлик билан ўрганиб чиқишдан сўнг қабул қилинди. Бу омилларнинг ҳар бири Бельгиянинг ўзининг неоколониал хомхаёлларини сақлаб қолишга қаратилган ночор уринишлари билан боғлиқ”, дейилади вазирлик баёнотида.
“Руандадаги барча белгиялик дипломатлар 48 соат ичида мамлакатни тарк этишлари шарт. Вена конвенциясига мувофиқ, Руанда Бельгиянинг Кигалидаги дипломатик ваколатхонаси бинолари, мулки ва архивларини ҳимоя қилишни таъминлайди”, дея қўшимча қилган вазирлик.
Баёнотда таъкидланишича, Бельгия узоқ вақтдан бери, айниқса Конго Демократик Республикаси (КДР) шарқидаги давом этаётган можарода Руандага нисбатан доимий равишда хоинлик қилиб келмоқда ва бу можарода Бельгия “айниқса Руандага қарши ҳаракатларда шафқатсиз тарихий рол” ўйнамоқда.
“Бугунги кунда Бельгия минтақавий можарода очиқ-ойдин бир томонга ўтиб олди ва турли халқаро майдонларда Руандага қарши тизимли равишда чиқишларни давом эттирмоқда. У Руандани ҳам, бутун минтақани ҳам беқарорлаштириш мақсадида, ёлғон ва фирибгарлик усулларидан фойдаланиб, Руанда ҳақида асоссиз душманлик фикрини шакллантирмоқда”, дея хулоса қилган дипломатик идора.
Кигали раҳбарияти Бельгиянинг 1994 йилда камситиш, таъқиб ва охир-оқибат туци халқига қарши геноцидга олиб келган этник экстремизмни авж олдиришда ҳалокатли тарихий рол ўйнаганини эслатиб ўтган.
2025 йил бошидан бери “23 март ҳаракати” (М23) қўзғолончилари КДР шарқида ҳужумларни бошлаган. Улар Шимолий ва Жанубий Киву вилоятларининг катта қисмини, жумладан уларнинг маъмурий марказлари Гома ва Букавуни босиб олган. КДР ҳукумати Руандани М23ни ўз армиясининг мунтазам бўлинмалари билан қўллаб-қувватлашда айблаяпти. Кигали эса бу айбловларни рад этган.
Изоҳ (0)