Jahon sog‘liqni saqlash tashkiloti (JSST) Ruandada Marburg virusining ilk holatlari qayd etilganidan keyin mazkur virus epidemiyasi xavfi haqida ogohlantirdi.
JSSTning aniqlik kiritishicha, 26-sentyabr holatiga ko‘ra, ushbu virus bilan bog‘liq jami 26 ta, jumladan, sakkizta o‘lim holati qayd etilgan. Ruandaning 30 ta hududidan yettitasida bunday holatlar aniqlangan.
Kasallanganlarning aksariyati Ruanda poytaxti Kigali shahridagi ikkita tibbiyot tashkiloti xodimlaridir. JSST ma’lumotlariga ko‘ra, epidemiya xavfi milliy va mintaqaviy darajada juda yuqori, ammo global darajada past.
Marburg virusi Ebola oilasiga mansub va klinik jihatdan unga o‘xshaydi. U gemorragik bezgakni keltirib chiqaruvchi virusli kasallikdir. Infeksiya kasallangan odamlarning biologik suyuqliklari bilan bevosita aloqa qilish orqali, shuningdek, yuzalar va materiallar orqali yuqadi. Virus bilan og‘rigan bemorlarda kuchli bosh og‘rig‘i, qorin og‘rig‘i, burun va og‘izdan qon ketishi kabi alomatlar kuzatiladi.
Virusning o‘lim darajasi 88 foizga yetadi. Tashkilotning qayd etishicha, hozirda Marburgga qarshi vaksina mavjud emas. Uni davolash simptomatik bo‘lib, immunitetni saqlash uchun preparatlar qo‘llanadi.
Germaniyaning Bild nashri xabar berishicha, 2-oktyabr kuni Germaniya federal politsiyasi ikki yo‘lovchida Marburg virusi alomatlari borligi sababli Gamburg markaziy vokzalidagi ikkita yo‘lni bir necha soatga yopib qo‘ygan. Dastlabki ma’lumotlarga ko‘ra, yo‘lovchilardan biri avvalroq Ruandaga borgan va u yerda virus yuqtirgan bemor bilan aloqada bo‘lgan.
Izoh (0)