Buyuk Britaniyadagi noqonuniy muhojirlar Ruandaga deportatsiya qilinadi. Birinchi deportatsiya 10-12 hafta ichida amalga oshiriladi. Bu haqda Britaniya bosh vaziri Rishi Sunakka tayanib, The Guardian xabar berdi.
Britaniya parlamentining yuqori palatasi hukumat bosimi ostida mamlakat hududini noqonuniy kesib o‘tgan migrantlarni Ruandaga deportatsiya qilish bo‘yicha bahsli qonun loyihasini qabul qildi. U Lordlar palatasi tomonidan ma’qullangan. Parlamentning har ikki palatasi tomonidan qabul qilingan qonun loyihasi Britaniya qiroli Charlz III tomonidan imzolanganidan keyin kuchga kiradi.
Avvalroq Ruandaga noqonuniy muhojirlarni deportatsiya qilish 2024-yilning bahorida boshlanishi taxmin qilingandi. Rishi Sunak kechikishda leyboristlar va Lordlar palatasini ayblagan. Migrantlar tijorat charter reyslarida olib ketiladi, bu muntazam ravishda amalga oshiriladi, biroq bir reysda qancha odam ketishi aytilmagan.
Ruandaga sarmoya kiritish uchun qochqinlarni yuborish
Ruanda bilan hamkorlik qilish tashabbusi birinchi marta Buyuk Britaniyaning sobiq bosh vaziri Boris Jonson tomonidan 2022-yilda e’lon qilingan. Shartnomada London Ruandaga noqonuniy muhojirlarni yuborishi va Ruanda iqtisodiy rivojlanish uchun Londondan millionlab dollar sarmoya olishi nazarda tutilgan.
Jonsonning tashabbusi Britaniya jamiyati va Yevropa Ittifoqi mamlakatlarida keskin tanqidlarga sabab bo‘lgan. 2022-yil iyun oyida Britaniya rasmiylari 30 nafar noqonuniy muhojirni Ruandaga deportatsiya qilmoqchi bo‘lgan birinchi reys so‘nggi daqiqada Inson huquqlari bo‘yicha Yevropa sudi qarori tufayli bekor qilingan.
Mamlakatning amaldagi bosh vaziri Rishi Sunak 22-aprel kuni Buyuk Britaniyadan deportatsiya qilingan muhojirlar bilan birinchi reyslarni 2024-yil iyul oyida jo‘natishga va’da bergandi.
Izoh (0)