Бугун, 10 март куни Франциянинг Париж шаҳрида Ўзбекистон туризм форуми ташкил этилди. “Дарё” фотомухбири Мадина Нурман тадбирда бўлиб, жараёндан суратлар олди.
Тадбир Туризм қўмитаси, Ўзбекистоннинг Франциядаги элчихонаси ҳамда Франциянинг туризм ташкилотлари ҳамкорлигида уюштирилди.
Форум доирасида “Ўзбекистон – Ипак йўлининг дурдонаси” мавзусида мамлакат туризм салоҳиятига доир тақдимот ўтказилди.
Тадбир очилиш маросими Ўзбекистон ҳақидаги видеоролик намойиши билан бошланди. Роликда мамлакат табиати, маданияти ва анъаналари акс этган бўлиб, тасвирлар иштирокчиларда катта қизиқиш уйғотди.
Маросимда Туризм қўмитаси раиси Умид Шадиев сўзга чиқиб, Ўзбекистоннинг сайёҳлик борасида эришаётган ютуқлари, республикада сайёҳларга қулай шароит яратиш йўлидаги янгиликларни айтди.
Тадбирда “Uzbekistan Airways” авиакомпаниясининг туризмни ривожлантиришдаги ўрни ва сайёҳларга юқори сифатли хизмат кўрсатиш имкониятлари ҳам намойиш этилди.
Тадбирнинг асосий мақсади – Ўзбекистон ва Франция ўртасидаги туризм ҳамкорлигини мустаҳкамлаш ва мамлакатни хорижий сайёҳлар учун жозибадор йўналишга айлантиришдан иборат.
Изоҳ (0)