Qatar “PSJ”ni moliyalashtirishni to‘xtatishi mumkin

Qatar davlati “PSJ” klubiga investitsiyalarni to‘xtatishi mumkin. Bu haqda RMC Sport xabar berdi.

Bunga klub prezidenti Nosir Al-Xelayfi ovozlarni sotib olishda hamda ovoz berish erkinligiga tajovuz qilishda ayblanayotgani sabab bo‘lishi mumkin. Shuningdek, u Lagardere kompaniyasiga zarar yetkazish maqsadida vakolatlarini suiiste’mol qilishda ham gumon qilinmoqda. 

Manbaga ko‘ra, Al-Xelayfi o‘z ta’siridan foydalanib, Qatar sarmoya jamg‘armasini (klubning asosiy aksiyadori) Lagardere kompaniyasini boshqarish bilan bog‘liq bahsli holatda qarorini o‘zgartirishga majburlagan bo‘lishi mumkin.

Qatarliklar bu vaziyatdan juda norozi va agar ayblovlar davom etsa, Fransiyaga, jumladan, “PSJ”ga sarmoya kiritishni to‘xtatish bilan tahdid qilmoqda.

“Qatarliklar bunday muomaladan charchagan. Ularni doim ayblashadi, sudga berishadi, tanqid qilishadi. Har safar yordam bermoqchi bo‘lishsa, buni ‘bosim o‘tkazish’ deb atashadi. Hammaning sabr kosasi to‘ldi”, deydi hukumatga yaqin manba.