28-yanvar kuni “Uzuklar hukmdori” va “Hobbit” filmlarining yulduzi 44 yoshga to‘ldi. Xo‘sh, sevimli aktyor hozirda nimalar bilan shug‘ullanmoqda?
Qo‘rqinchli filmlar ishlab chiqaradi
Bunga ishonish qiyin, ammo dunyodagi eng mashhur fantastik filmlar yulduzi ko‘p yillardan beri majoziy ma’noda qo‘rqinchli filmlar havosidan nafas oladi. Bu ishtiyoq unda birinchi marta 2012-yilda “Manyak” filmida suratga tushganidan keyin paydo bo‘ldi. 1980-yilda xuddi shu nomdagi slesherning remeyki bo‘lgan “Manyak” filmida u hobbitg mutlaqo o‘xshamaydigan, shizofreniyaga chalingan shafqatsiz seriyali qotil Frenk Zito rolini o‘ynadi.
Aktyorlik — turli shaxslarni tasvirlay olish, degani shu bo‘lsa kerak. Menga kelsak, doim oldingi rollarimdan farq qiladigan obrazlarni o‘ynashga qiziqib kelganman. Buning turli sabablari bor. Birinchidan, bu oson emasligi, shuningdek, men butunlay boshqa janrlarning muxlisi ekanligim uchun, degandi aktyor.
Garchi “Manyak” filmi prokatda kamtarona natijaga erishgan bo‘lsa-da, Vud bu turdagi filmlarga ko‘proq e’tibor berishga qaror qildi. 2010-yilda aktyor Woodshed prodyuserlik kompaniyasining asoschilaridan biri bo‘lgan. Keyinchalik u SpectreVision deb o‘zgartirildi va kam byudjetli qo‘rqinchli filmlar ishlab chiqarishga ixtisoslashdi. O‘shandan beri Vud prodyuserlik bilan faol shug‘ullanib kelmoqda va bir qator dahshatli filmlar yaratilishiga hissa qo‘shdi. Jumladan, “La’natlangan dushman” (2020), “Boshqa dunyodan rang” (2019). 2025-yilda Stiven King hikoyasi asosida suratga olingan “Maymun” dahshatli filmi chiqadi.
Dijeylik bilan shug‘ullanadi
Aktyorning yana bir g‘ayrioddiy qiziqishi — dijeying. Elayja musiqaga ko‘pdan beri qiziqardi va u “Uzuklar hukmdori”da rol o‘ynagan paytlaridayoq dijeying bilan oz-ozdan shug‘ullana boshlagan. U klublar va tadbirlarda tez-tez chiqish qiladi va hatto 2005-yilda Simian Records musiqiy leybliga asos solgan. To‘g‘ri, bu borada ishi uncha yurishmadi, lekin dijey Vud hanuzgacha o‘z ustida ishlashda davom etmoqda.
Aktyorlik va musiqani taqqoslab, Elayja musiqa uning uchun o‘zini namoyon qilishning haqiqiy usuli ekanligini tan oladi, chunki dijeying uning boshqa sohalardagi faoliyati bilan hech qanday aloqasi yo‘q.
Multfilm va videoo‘yinlarga ovoz beradi
Ajablanarlisi shundaki, aktyorda ijodiy talantning mutlaqo boshqa qirralari mavjud. Masalan, Elayja qo‘rqinchli filmlarni yaxshi ko‘rishiga qaramay, animatsion filmlarga zavq bilan ovoz beradi. Uning dublyajdagi mashur ishidan biri — “Quvnoq oyoqchalar” (2006) to‘liq metrajli multfilmidagi raqsga tushadigan pingvin bolasi Mamblga ovoz bergani bo‘ldi.
2010-yilda Vud multfilmning sikvelida yana shu personajini ovozlashtirdi. Bundan tashqari, “9” nomli post-apokaliptik animatsion film, “To‘siqning narigi tomonida” (2014) va “Yulduzlar jangi: qarshilik” (2018) animatsion seriallari ustida ishladi. Vud multfilmlardan tashqari, videoo‘yinlar qahramonlariga ham ovoz beradi.
Ilk bor ota bo‘ldi
Aktyor shaxsiy hayoti haqida gapirmaslikni afzal ko‘radi. Biroq aktyor har doim g‘ayrioddiy qizlar bilan uchrashgani ma’lum — avval nemis aktrisasi Franka Potente, keyin Gogol Bordello guruhi barabanchisi Pamela Rasin bilan. 2018-yilda OAV aktyorning o‘sha paytda turmushga chiqqan daniyalik prodyuser Mette-Mari Kongsved bilan ishqiy munosabati haqida yoza boshladi. Vaqt o‘tishi bilan bu shunchaki mish-mish emasligi ma’lum bo‘ldi: ular haqiqatan ham birga bo‘lib, o‘g‘il va qiz farzandning ota-onasi bo‘lishdi. 2025-yil boshida Elayja va Mette-Marining yashirin to‘yi haqida ma’lumot paydo bo‘ldi.
Bugungi kunda Elayja Vud 20 yil oldingi ko‘rinishiga o‘xshamasa-da, ko‘pchilik muxlislar uchun o‘sha samimiy hobbit bo‘lib qolmoqda.
Uni Frodo deb atashsa, xafa bo‘lmaydi
Aktyorni muntazam ravishda mashhur roli bilan eslashadi — masalan, muxlislar uni ba’zan Frodo deb atashadi. Lekin bu uni umuman xafa qilmaydi.
Ha, bu rolni tashrif qog‘ozim, desayam bo‘ladi. Nima bo‘lganda ham, bu mening eng ko‘zga ko‘ringan ishim. Men madaniy jihatdan ko‘plab jabhani qamrab oladigan kinoning bir parchasiga aylandim, shuning uchun bu rol har doim hayotimning bir qismi bo‘lib qoladi.
Izoh (0)