Senatning uchinchi yalpi majlisida “Voyaga yetmaganlar o‘rtasida huquqbuzarliklar profilaktikasi tizimi takomillashtirilishi munosabati bilan Maʼmuriy javobgarlik to‘g‘risidagi kodeksga o‘zgartirishlar kiritish haqida”gi qonun ko‘rib chiqilib, maʼqullandi.
Prezidentning 2024-yil 5-fevraldagi tegishli qarori bilan Ichki ishlar organlarining voyaga yetmaganlar masalalari bo‘yicha inspektor-psixologlari (katta inspektor-psixologlari) lavozimlari Milliy gvardiya tuzilmasiga o‘tkazilgandi. Mazkur qarorga muvofiq Milliy gvardiyada Bolalar bilan ishlash boshqarmasi va uning hududiy bo‘linmalari tashkil etildi, shuningdek voyaga yetmaganlar masalalari bo‘yicha katta inspektor-psixologlar va inspektor-psixologlar lavozimlari joriy etildi.
Majlisda qayd etilishicha, yangi tashkil etilgan lavozimlarda xizmat qiluvchi shaxslarga, shu jumladan, voyaga yetmaganlar masalalari bo‘yicha katta inspektor-psixologlar va inspektor-psixologlarga ichki ishlar organlarining voyaga yetmaganlar masalalari bo‘yicha inspektor-psixologlarining qonun hujjatlarida belgilangan vakolatlarini berish zarurati yuzaga kelmoqda.
Milliy gvardiyaning inspektor-psixologlari fevral oyidan hozirgi kunga qadar 44 450 ta Maʼmuriy javobgarlik to‘g‘risidagi kodeksining 47-moddasi (bolalarni tarbiyalash va ularga ta’lim berish borasidagi majburiyatlarni bajarmaslik) birinchi qismida nazarda tutilgan huquqbuzarliklarni aniqlab, ichki ishlar organlarining profilaktika inspektorlari orqali maʼmuriy jazo choralari qo‘llanishini taʼminlagan hamda ota-onalar tomonidan farzandlarini maktabga yubormaslik holatlari bo‘yicha 175 mingga yaqin ogohlantirish xatlari yozilgan.
Bugungi kunda 1 nafar inspektor-psixologga maktablardagi bola sonidan kelib chiqib 3 tadan 10 tagacha maktab to‘g‘ri kelmoqda.
Biroq inspektor-psixologlar tomonidan voyaga yetmagan huquqbuzarning ota-onalariga nisbatan maʼmuriy jazo choralarini qo‘llash uchun tayanch punkti profilaktika inspektorining oldiga olib borib, maʼmuriy jazo choralari qo‘llanishi — inspektor-psixologlarning ish samaradorligiga salbiy taʼsir ko‘rsatib, ortiqcha vaqt sarflashiga ham sabab bo‘lmoqda.
Shu sababli qonun bilan Milliy gvardiya va IIV vakolatlariga doir Ma’muriy javobgarlik to‘g‘risidagi kodeksning 248 va 248-1 moddalariga o‘zgartirish kiritilmoqda. Xususan, Milliy gvardiya organlari, shu jumladan, uning voyaga yetmaganlar masalalari bo‘yicha inspektor-psixologlariga Ma’muriy javobgarlik to‘g‘risidagi kodeksning 4 moddasi bo‘yicha ma’muriy ishlarni ko‘rish vakolati berilmoqda:
- bolalarni tarbiyalash va ta’lim berish borasida majburiyatlarini bajarmaslik (47-modda);
- jamoat joylarida sigaret chekish (56-1-modda)
- jamoat joylarida alkogol mahsulotlarini iste’mol qilish (187-modda 1-qismi);
- voyaga yetmagan shaxsni g‘ayriijtimoiy xatti-harakatlarga jalb qilish (188-modda) nazarda tutilgan ma’muriy ishlarni ko‘rib chiqish va jazo qo‘llash vakolati.
Shuningdek, bu vakolatlar IIVning voyaga yetmaganlar bo‘yicha inspektor-psixologlarining vakolatlaridan chiqarib tashlanishi nazarda tutilgan.
Senatorlarning qayd etishicha, qonunning qabul qilinishi Milliy gvardiya organlarining voyaga yetmaganlar o‘rtasida huquqbuzarliklar profilaktikasiga, shuningdek bolalarning huquqlari, erkinliklari hamda qonuniy manfaatlarini himoya qilishga doir faoliyati samaradorligini oshirishga xizmat qiladi.
Izoh (0)