Сенатнинг учинчи ялпи мажлисида “Вояга етмаганлар ўртасида ҳуқуқбузарликлар профилактикаси тизими такомиллаштирилиши муносабати билан Маъмурий жавобгарлик тўғрисидаги кодексга ўзгартиришлар киритиш ҳақида”ги қонун кўриб чиқилиб, маъқулланди.
Президентнинг 2024 йил 5 февралдаги тегишли қарори билан Ички ишлар органларининг вояга етмаганлар масалалари бўйича инспектор-психологлари (катта инспектор-психологлари) лавозимлари Миллий гвардия тузилмасига ўтказилганди. Мазкур қарорга мувофиқ Миллий гвардияда Болалар билан ишлаш бошқармаси ва унинг ҳудудий бўлинмалари ташкил этилди, шунингдек вояга етмаганлар масалалари бўйича катта инспектор-психологлар ва инспектор-психологлар лавозимлари жорий этилди.
Мажлисда қайд этилишича, янги ташкил этилган лавозимларда хизмат қилувчи шахсларга, шу жумладан, вояга етмаганлар масалалари бўйича катта инспектор-психологлар ва инспектор-психологларга ички ишлар органларининг вояга етмаганлар масалалари бўйича инспектор-психологларининг қонун ҳужжатларида белгиланган ваколатларини бериш зарурати юзага келмоқда.
Миллий гвардиянинг инспектор-психологлари февраль ойидан ҳозирги кунга қадар 44 450 та Маъмурий жавобгарлик тўғрисидаги кодексининг 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) биринчи қисмида назарда тутилган ҳуқуқбузарликларни аниқлаб, ички ишлар органларининг профилактика инспекторлари орқали маъмурий жазо чоралари қўлланишини таъминлаган ҳамда ота-оналар томонидан фарзандларини мактабга юбормаслик ҳолатлари бўйича 175 мингга яқин огоҳлантириш хатлари ёзилган.
Бугунги кунда 1 нафар инспектор-психологга мактаблардаги бола сонидан келиб чиқиб 3 тадан 10 тагача мактаб тўғри келмоқда.
Бироқ инспектор-психологлар томонидан вояга етмаган ҳуқуқбузарнинг ота-оналарига нисбатан маъмурий жазо чораларини қўллаш учун таянч пункти профилактика инспекторининг олдига олиб бориб, маъмурий жазо чоралари қўлланиши — инспектор-психологларнинг иш самарадорлигига салбий таъсир кўрсатиб, ортиқча вақт сарфлашига ҳам сабаб бўлмоқда.
Шу сабабли қонун билан Миллий гвардия ва ИИВ ваколатларига доир Маъмурий жавобгарлик тўғрисидаги кодекснинг 248 ва 248-1 моддаларига ўзгартириш киритилмоқда. Хусусан, Миллий гвардия органлари, шу жумладан, унинг вояга етмаганлар масалалари бўйича инспектор-психологларига Маъмурий жавобгарлик тўғрисидаги кодекснинг 4 моддаси бўйича маъмурий ишларни кўриш ваколати берилмоқда:
- болаларни тарбиялаш ва таълим бериш борасида мажбуриятларини бажармаслик (47-модда);
- жамоат жойларида сигарет чекиш (56-1-модда)
- жамоат жойларида алкоголь маҳсулотларини истеъмол қилиш (187-модда 1-қисми);
- вояга етмаган шахсни ғайриижтимоий хатти-ҳаракатларга жалб қилиш (188-модда) назарда тутилган маъмурий ишларни кўриб чиқиш ва жазо қўллаш ваколати.
Шунингдек, бу ваколатлар ИИВнинг вояга етмаганлар бўйича инспектор-психологларининг ваколатларидан чиқариб ташланиши назарда тутилган.
Сенаторларнинг қайд этишича, қонуннинг қабул қилиниши Миллий гвардия органларининг вояга етмаганлар ўртасида ҳуқуқбузарликлар профилактикасига, шунингдек болаларнинг ҳуқуқлари, эркинликлари ҳамда қонуний манфаатларини ҳимоя қилишга доир фаолияти самарадорлигини оширишга хизмат қилади.
Изоҳ (0)