Farg‘ona viloyati O‘zbekiston tumanida farzandining maktabga qatnashiga to‘sqinlik qilgan otaga chora ko‘rildi. Bu haqda viloyat Milliy gvardiya boshqarmasi xabar berdi.
Qayd etilishicha, O‘zbekiston tumani XTBga qarashli 45-maktabga farzandini taʼlimga qaytarish va profilaktik tushuntirish ishlari olib borish maqsadida 43 yoshli fuqaro M.A. inspektor-psixolog tomonidan chaqirilgan. Suhbat davomida u o‘zini nosamimiy tutib, jamiyatda yurish-turish qoidalariga zid xatti-harakatlar sodir etib, farzandining taʼlimga qaytmasligini, hech kim hech narsa qila olmasligini taʼkidlab, Milliy gvardiya harbiy xizmatchisining qonuniy talablarini bajarmagan.
Mazkur holat yuzasidan fuqaroga nisbatan Ma’muriy javobgarlik to‘g‘risidagi kodeksning 183- (mayda bezorlik), 194-moddalari (ichki ishlar organlari xodimining qonuniy talablarini bajarmaslik) tartibida maʼmuriy bayonnoma rasmiylashtirilgan.
To‘plangan ish hujjatlari Jinoyat ishlari bo‘yicha O‘zbekiston tuman sudi tomonidan ko‘rib chiqilib, ushbu fuqaro huquqbuzarlik sodir etgan, deb topilgan va unga nisbatan 10 sutka maʼmuriy qamoq jazosi tayinlangan.
Shavkat Mirziyoyev 5-fevral kuni bo‘lib o‘tgan yig‘ilishda 2023-yilda voyaga yetmaganlar 3,5 ming jinoyat sodir etganini aytgandi. Shu munosabat bilan maktablardagi inspektor-psixologlar shtati Ichki ishlar vazirligidan Milliy gvardiya tizimiga o‘tkazilgan.
Izoh (0)