O‘zbekistonda Yangi yil kuni qor yog‘adimi?

Bu yil ham O‘zbekiston aholisi Yangi yilni qorsiz ob-havo bilan kutib oladi, deb xabar bermoqda “O‘zgidromet”.

Ma’lum qilinishicha, 30-dekabrda respublika hududi bo‘yicha ba’zi joylarda va 31-dekabrga o‘tar kechasi Toshkent viloyatining ayrim joylarida yog‘ingarchilik kuzatiladi, lekin tekislik hududlarda yog‘ingarchilik asosan yomg‘ir ko‘rinishida bo‘ladi. Faqat tog‘oldi va tog‘li hududlarda, shuningdek, respublika shimolida ba’zi joylarda yog‘ingarchilik qor ko‘rinishida bo‘lishi kutilmoqda.

Respublika hududining katta qismida 31-dekabr kunduz kuni va 1-yanvarda yog‘ingarchilik kutilmaydi.

30—31-dekabr va 1-yanvarda havo harorati asosan kechalari 0-5 daraja iliq, kunduz kunlari 5-10 daraja iliq atrofida, ba’zi joylarda 12 darajagacha iliq bo‘ladi. Shimolda kechalari 3-8 daraja sovuq, kunduz kunlari 0-5 daraja iliq bo‘ladi.

Yangi yil bayrami kunlari O‘zbekistonda ob-havo odatda qanday bo‘ladi?

Iqlim ma’lumotlari tahlili shuni ko‘rsatadiki, so‘nggi yillarda iqlim o‘zgarishi hisobiga O‘zbekistonning tekislik hududlarida va hatto tog‘oldi hududlarida qish faslidagi yog‘ingarchiliklar ko‘pincha yomg‘ir yoki ho‘l qor ko‘rinishida yog‘ishi kuzatilmoqda.

So‘nggi 10 yil ichida O‘zbekiston hududining katta qismida Yangi yil bayramlari qorsiz o‘tgan. Ushbu asrda 2007-yilning birinchi kuni eng qorli kun bo‘lgan. 2007-yilning yangi yil kechasi arafasida qor yog‘ishi boshlanib, 1-yanvarda butun kun davomida kuzatilgan.

Shunday yillar kuzatilganki, qor Yangi yil bayramidan bir necha kun oldin yog‘gan va Yangi yil bayramigacha qor qoplami saqlanib turgan. Bu holat 2011—2012-yillarda kuzatilgan.

2024-yilda ham O‘zbekiston aholisi Yangi yil bayramini qorsiz kutib olgandi.

Yangi yil bayramida o‘zbekistonliklar 6 kun dam oladi. 2025-yilda 5 kunlik ish haftasida ishlaydigan xodimlar uchun dam olish kuni 4-yanvar, shanba kunidan 2-yanvar, payshanba kuniga ko‘chirildi hamda 6 kunlik ish haftasida ishlaydigan xodimlar uchun 2-yanvar, payshanba qo‘shimcha dam olish kuni etib belgilandi. Yangi yil kechasi birinchi marta tungi soat 02:00 gacha ishlaydi.