Surxondaryo viloyatining Bandixon tumanidagi 2-sonli umumta’lim maktabining oliy toifali boshlang‘ich sinf o‘qituvchisi Habiba Bozorova maktablardagi yangi darsliklar haqida gapirib, avvalgi darsliklarga nisbatan o‘quvchi uchun ancha qulay ekanini aytmoqda. O‘qituvchi “Daryo” jurnalisti bilan suhbatda yangi darsliklarning eski darsliklarga nisbatan ustunlik jihatlarini sanab o‘tdi.
Yangi avlod darsliklari ta’lim standartlari talablariga javob bera oladigan, mukammal qilib yaratilgan. Kitoblar dizayn jihatidan ham chiroyli ishlangan. Kitob muqovasining ranglari yorqin va kayfiyatni ko‘taruvchi. Kitobni ilk bor qo‘limizga olganimizda ranglarini ko‘rib xursand bo‘lganman. Bu holatni o‘quvchilarimda ham kuzatdim. Avvalgi darsliklarimiz bilan solishtirganda yangi darsliklarimiz ixchamligi va asosiy fanlarimizning to‘rt qismdan iboratliligi bilan alohida ajralib turadi. Har bir chorakda alohida, bittadan kitobni o‘qiymiz. Kitobni o‘qib tugatish barobarida ish rejani ham tugatamiz. Ikkinchi chorakda esa kitobning ikkinchi chorak uchun mo‘ljallangan ikkinchi qismini olamiz. Tez-tez almashgan kitob eskirmaydi va yangi holatini yo‘qotmaydi, — deydi Bandixon tumanidagi 2-sonli maktabning boshlang‘ich sinf o‘qituvchisi Habiba Bozorova.
“Yangi darsliklardagi topshiriqlar rasmlar asosida berilgan, bu o‘quvchi uchun juda qulay”
O‘quvchi eshitganidan ko‘ra, ko‘rganini yaxshi eslab qoladi. Shu sababdanmi yangi darsliklardagi topshiriqlar rasmlar asosida berilgan. Darslik qahramonlarining fotorobotlari ham bor. Aziza, Madina, Umida, Jasur, Akmal va Sardor ismli olti nafar qahramonlarimiz o‘quvchilarga o‘zining tilida topshiriqlar beradi. Shuningdek, yangi darsliklarimiz zamonaviy metodlar bilan boyitilgan. Ilgari biz bu metodlar haqida internetdan izlab topardik. Va o‘quvchilarga bajartirardik. Hozir esa o‘sha ma’lumotlar aynan yangi darsliklarimizda jamlangan. Bu nafaqat o‘quvchilarga, o‘qituvchilarga ham qulay bo‘lyapti. Qiziqarli topshiriqlar orqali darsga qiziqmaydigan o‘quvchilarni ham darsga qiziqtirib, o‘qityapmiz, — deydi u.
“Yangi darsliklar o‘quvchilarning kreativ, tanqidiy va mantiqiy fikrlashini oshiradi”
Darsliklarimizda mavzudan tashqari yondash mavzular ham bor. Masalan Botanika bog‘i yoki bouling sport turini olaylik. Yondash mavzu nima bo‘lsa, topshiriqlar ham shunga monand bo‘ladi. Masalan Botanika bog‘i mavzusiga, aynan shunga o‘xshash topshiriqlar beriladi. Yangi avlod darsliklari 4K moduli asosida yaratilgan bo‘lib, o‘quvchilarning guruh bo‘lib ishlashida, kreativ, tanqidiy va mantiqiy fikrlashi orqali hamjihatliligi oshadi. Darsliklarimizdagi topshiriqlarning barchasi ham yozma tarzda bajariladigan topshiriqlar emas. Ba’zilarini og‘izaki shaklda bajarsa ham bo‘ladi. Qolaversa, sinfda barcha o‘quvchi darslarni birdek o‘zlashtirolmaydi. Qo‘shimcha topshiriqlar esa iqtidorli o‘quvchilar uchun yaratilgan bo‘ladi. Asosiy topshiriqlarni tez bajarib, bo‘sh qolgan o‘quvchilarga qo‘shimcha topshiriqlar berib, ularni band qilyapmiz. Bundan tashqari yangi darsliklarning yana bir qulay, nafaqat o‘qituvchilarni, o‘quvchilarni ham quvontirgan jihati ona tili va o‘qish darsligining alohida fan sifatida bir-biridan ajratilgani bo‘ldi. O‘tgan o‘quv yillarida bu ikki darslik qo‘shilib, yaxlit qilingan edi. Ona tili va o‘qish fanlarining yaxlitligi o‘quvchilarni qiynab qo‘yayotgan edi. Yangi darsliklarning yana bir qulayligi Quar-kodli bo‘lganida. Ba’zi sabablarga ko‘ra, darsga kelolmagan o‘quvchi uyda, ota-onalari yordamida shu quar-kod yordamida dars mashg‘ulotlarini olib, vazifasini bajarib, tengdoshlariga qo‘shilib oladi, — deydi Habiba Bozorova.
“Yangi darsliklardagi Alifbe darsligi tubdan isloh qilingan”
Birinchi sinf o‘quvchilariga yangi o‘quv yilidan boshlab, informatika darslari ham kiritilgach, ular bu fanni qanday o‘zlashtirar ekan, dars mashg‘ulotlarini o‘zimiz o‘tamizmi yoki boshqa o‘qituvchilar o‘tadimi degan savol tug‘ilgandi. Darsliklarni qo‘limizga olib, mavzulari bilan tanishganimizdan so‘ng mavzulari sodda, o‘quvchi yoshi hisobga olingani va bu fan Atrofimizdagi olam darsligi bilan chambarchas bog‘liqligini ko‘rdik. Bu fan o‘quvchilarimizning yuqori sinflarga o‘tganida aynan shu fandan qiynalmasligiga poydevor vazifasini bajarar ekan. Yana bir muhim jihati biz hozirgi kunda axborot texnologiyalari zamonida yashayapmiz. Birinchi sinfdan bu fanni o‘qib, o‘rganib borishsa, IT sohasini yaxshi o‘rganib oladi. Yangi darsliklardagi Alifbe darsligi tubdan isloh qilingan. Kitobning har bir varag‘ida oldingi va keyingi o‘tilgan harflar yozilib ketiladi. O‘quvchi oldin nima dars o‘rganini ko‘radi va yodga oladi. Bu yilgi kitoblarga qo‘shimcha Alifbedan mashq daftari ham qo‘shilgan. Bu o‘quvchi uchun yanayam qulaylik yaratadi. Mashq daftarida qiziqarli topshiriqlar ham bor. Yozuv daftarlarimiz ham o‘quvchilar uchun juda qulay shaklda yaratilgan. Texnologiya va tasviriy san’at fanlarida ham topshiriqlar juda qiziqarli berilgan. Ayniqsa texnologiya kitobida detallarni yasashning boshidan oxirigacha bo‘lgan qismi ko‘rsatib berilgan. Buni ko‘rgan o‘quvchilar ustoz yordamisiz ham topshiriqlarni bajara olishadi. Matematika darsligida o‘quvchining pul bilan muomala qilishini o‘rgatuvchi topshiriqlar ham berilgan, — deydi o‘qituvchi.
Izoh (0)