2-dekabr Xalqaro qullikka barham berish kuni munosabati bilan AQSH Moliya vazirligining Xorijiy aktivlarni nazorat qilish boshqarmasi (OFAC) Urganch shahridagi davlat mehribonlik uyida odam savdosi va gender zo‘ravonlik, jumladan, bolalarga nisbatan jismoniy va jinsiy zo‘ravonlik bilan shug‘ullangan o‘zbekistonlik uch sobiq davlat xizmatchisiga qarshi sanksiya qo‘llaydi.
Har uchala shaxs ham Magnitskiyning Inson huquqlari bo‘yicha global qonuniga asoslangan hamda butun dunyo bo‘ylab inson huquqlarini jiddiy poymol qilgan jinoyatchilarga qaratilgan AQSH prezidentining 13818-sonli Ijroiya farmoni (E.O.) asosida sanskiyalar ro‘yxatiga kiritildi.
Shu bilan birga, bu shaxslarga nisbatan Davlat departamenti tomonidan yillik Davlat departamenti, xorijiy operatsiyalar va tegishli dasturlarni ajratish to‘g‘risidagi qonunning 7031(c) bo‘limiga muvofiq viza cheklovlari qo‘yiladi. 7031(c) bo‘lim Davlat kotibi chet ellik amaldorlar jiddiy korrupsiyaga yo‘l qo‘ygan yoki inson huquqlarini qo‘pol ravishda buzganliklari to‘g‘risida ishonchli ma’lumotga ega bo‘lgan hollarda, mazkur shaxslar va ularning yaqin oila a’zolari Qo‘shma Shtatlarga kiritilmasligini nazarda tutadi.
“Bugungi harakatlar davlat xizmatchilari gender zo‘ravonlik hamda odam savdosi tizimini saqlash uchun o‘z kuch va mavqeidan foydalangandagi holatlarning ayanchli oqibatlarini ta’kidlaydi. Qo‘shma Shtatlar himoya qilishga mas’ul bo‘lganlarni ekspluatatsiya qilishga intilayotganlarni javobgarlikka tortishga sodiq qoladi”, dedi vazirlik vakili Bredli T. Smit
Davlat mehribonlik uyida inson huquqlarining jiddiy buzilishi
Yulduz Xudayberganova, Anvar Kuryazov va Oybek Masharipovlar davlat xizmatchisi bo‘lgan davrda bir necha bor jismoniy, jinsiy zo‘ravonlik hamda mehribonlik uyi tarbiyalanuvchilarini “pullash” bilan shug‘ullangan. O‘shanda Xudayberganova mehribonlik uyi direktori, Masharipov Xorazm viloyati adliya boshqarmasi boshlig‘i, Kuryazov tuman favqulodda vaziyatlar bo‘limi boshlig‘i lavozimlarida ishlagan.
Xudayberganova 10 oy davomida kamida uch nafar voyaga yetmagan qizni pul va moddiy buyum evaziga kamida olti xil erkak bilan jinsiy aloqa qilishga majburlagan. Xudayberganova qizlarning roziligiga erishish uchun turli xil majburlash usullarini qo‘llagan, jumladan, jismoniy kaltaklash, tahdid qilish, och qoldirish va tengdoshlaridan ajratib qo‘yish. Masharipov ham, Kuryazov ham mehribonlik uyiga bergan “sovg‘a”lari uchun kompensatsiya sifatida yetim bolalar bilan jinsiy aloqada bo‘lishni talab qilishgan. Kuryazov va Masharipov yosh qizlarni o‘lja qilish uchun bolalar uyiga bir necha bor tashrif buyurishgan.
“Xudayberganova, Kuryazov va Masharipovlar 13818-sonli farmonga asosan inson huquqlarining jiddiy buzilishida bevosita yoki bilvosita ishtirok etganlik uchun sanksiyalar ro‘yxatiga kiritildi”, deyiladi AQSH Moliya vazirligi bayonotida.
Izoh (0)