“Bu holat piramidaning uchi xolos”. Mehribonlik uyi tarbiyalanuvchilari zo‘rlanganiga blogerlar nima deydi? 

Xorazm viloyatida 3 nafar mehribonlik uyi tarbiyalanuvchisi 10 oy davomida viloyat Adliya boshqarmasi boshlig‘i va tuman favqulodda vaziyatlar bo‘limi boshlig‘i tomonidan zo‘rlab kelingani haqida xabar qilingandi. Ushbu xabar Ijtimoiy tarmoqning o‘zbek segmentida keskin muhokamalarga sabab bo‘lmoqda.

Oilaviy mehribonlik uyi rahbari o‘z vasiyligidagi 3 nafar qizni tanlab olgan va 10 oy davomida (2021-yil may — 2022-yil fevral) moddiy rag‘bat evaziga turli erkaklar bilan jinsiy aloqa qilishga majburlagan. Ma’lum qilinishicha, sud jarayonida barcha ayblanuvchilar “qizlar buni o‘z ixtiyori bilan qilgani, ularni hech kim majburlamaganini” aytgan.

Sud hukmiga ko‘ra, mehribonlik uyi mudirasiga 5 yil-u 6 oyga ozodlikdan mahrum qilish jazosi tayinlangan. Yosh bolalar bilan jinsiy aloqada bo‘lgan ikki mas’ulga esa 1,5 yilga ozodlikni cheklash jazosi belgilangan. Bu vaqt davomida ularga 22:00 dan 06:00 gacha uydan chiqish, shuningdek, probatsiya organlarini ogohlantirmasdan yashash joyini o‘zgartirish va yashash tumani chegaralarini tark etish taqiqlanadi.

Gap qonun yo‘qligida emas

Iqtisodchi Otabek Bakirov yuqoridagi holatga munosabat bildirib, bu vaziyatda muammo qonun yo‘qligi emas, bor qonunning ishlamasligida ekanini aytdi.

“Har gal shunaqa dahshatli keyslar yuz berganda qurbonlar, yo‘qotishlar va og‘riqlar bejizga bo‘lgan bo‘lmasin deymiz. Lekin hammasi bejizga bo‘lgan bo‘ladi. Shunchaki qurbon bergan bo‘lamiz. Xulosalar va o‘zgartirishlar qilinmaydi. Qayta va qayta takrorlanaveradi”, — deb yozdi u Twitter’da.

“Odatdagi ishdek bo‘lib qolgan”

Jurnalist Muhrim A’zamxo‘jayevning fikricha, aybdorlar bu jinoyatni qo‘rqmay sodir etishiga sabab — jabrlanuvchilar hech qayerga shikoyat qilib bormasligiga ishonchi komil.

“Shuning uchun ham qo‘rqmay oylab, ehtimol, yillab shu ish bilan shug‘ullanishgan. Nafaqat ular, katta ehtimol bilan, boshqalar ham. Bu hali bor-yo‘g‘i adliya boshqarmasi, FVB — tayinli qudrati yo‘q tashkilot vakillarining qilmishi. Ularki shunchalikka borgan bo‘lsa, qudratlilari haqida o‘ylashga ham qo‘rqasan kishi. Bu qandaydir tizimli jarayon, an’anami, odatdagi ishdek bo‘lib qolgan narsa, nazarimda”, — deya xavotirlarini bildirdi u.

“Demak, davlat tashkilotlari bir tiyinlik ish qilmayapti”

Huquqshunos bloger Xushnudbek Xudoyberdiyev vakolatli davlat tashkilotlari ushbu holatdan ancha avval xabardor bo‘lganini, ammo faqat ijtimoiy tarmoqqa tarqalgandan so‘ng “soxta achinishlarga boy bayonotlar” berayotganini ta’kidladi.

“Xuddiki o‘zini hech narsadan xabari yo‘qday tutib, do‘ppi tor kelib qolganidan noiloj berilgan bayonotlar. Agar ijtimoiy tarmoqlarda odamlar qahr va g‘azab sochmaganda edi, ushbu tashkilotlar ikki dunyoda ham bu voqeaga e’tibor qaratib o‘tirmasdi.

Yoki agar ular rostdan bugungi kungacha bu voqeadan bexabar bo‘lgan bo‘lishsa, unda bu yanada yomon. Demak, ular bir tiyinlik tayinli ish qilishmayapti, o‘z vazifasini tayinli bajarishmayapti degani. Vaholanki tizim ichida turib, bu voqeadan bexabar qolib ketish uchun ko‘zi ko‘r, qulog‘i kar bo‘lish kerak

Shaxsan men buni adolatsiz hukm deb hisoblayman!”, — dedi Xushnudbek Xudoyberdiyev.

“Nega jazo bunchalik yengil?”

Yana bir huquqshunos Bahodir Ahmedov esa aybdorlarga berilgan jazoning yengil ekanidan taajjublandi.

“Nega jinoyatchilarga JK 205-modda (hokimiyat va mansab vakolatini suiiste’mol qilish) yoxud 206-modda (hokimiyat yoki mansab vakolati doirasidan chetga chiqish) jinoyatlari ham qo‘shib malakalanmadi? Axir ikkisining harakatlari oqibatida davlat va jamiyat manfaatlariga jiddiy ziyon yetkazilgan-ku? Nega bu holatda jazo bunchalik yengil?”, — deb savol qo‘ydi u.

“Bu ikki pedofil piramidaning uchi xolos”

Bloger va publitsist Nikita Makarenko ushbu holatda aybdor deb topilgan ikki mansabdor shunchaki piramidaning yuqori qismi ekanini aytdi.

“Mendagi ma’lumotlarga ko‘ra, bu ikki sudlangan pedofil piramidaning tepasidagi piyodalar xolos. Xorazmda eng katta mansabdorlardan iborat pedofillar guruhi bo‘lgan. Ular jazodan butunlay qutulib qolishdi. 

Ayni paytda qizlarning hayoti xavf ostida. Zudlik bilan ularni Toshkentga olib kelinmasa, guvoh sifatida ularni o‘ldirishlari mumkin. Ularni qutqaring”, — deb yozdi Makarenko.