Toshkent shahri Yunusobod tumanidagi ayrim hududlarga gaz yetkazib berish vaqtincha to‘xtatiladi. Bu haqda Energetika vazirligi matbuot xizmati xabar berdi.
Ma'lum qilinishicha, bugun, 13-noyabr kuni Toshkent shahrida taʼmirlash ishlarini olib borayotgan ekskavator Yunusobod tumani, 2-daha, 40-uy yonidan o‘tgan o‘rta bosimli yerosti gaz quvuriga shikast yetkazishi natijasida gaz sizib chiqish holati kuzatilgan.
Natijada ushbu dahadagi 47 ta ko‘p qavatli xonadon, 10 ta ulgurji isteʼmolchi, 3-dahadagi 26 ta ko‘p qavatli xonadon, 12 ta ulgurji isteʼmolchi va Malikov ko‘chasidagi 40 ta yerli xonadonda gaz taʼminoti vaqtincha to‘xtatilgan.
Ayni vaqtda “Hududgaz Poytaxt” gaz taʼminoti filiali xodimlari tomonidan taʼmirlash ishlari olib borilmoqda.
Ta’mirlash ishlari yakunlangach gaz ta’minoti qayta tiklanadi.
Avvalroq Toshkent shahri Yakkasaroy tumani, Bobur ko‘chasida 8-noyabr kuni ekskavator yordamida qazish ishlari olib borilayotganda, ehtiyotsizlik oqibatida o‘rta bosimli gaz quvuriga shikast yetkazilgani natijasida Yakkasaroy va Mirobod tumanlarida tabiiy gaz tarmog‘idan vaqtincha o‘chirilgani xabar qilingandi.
Izoh (0)