O‘zbekiston qonunchiligida 1-noyabrdan nimalar o‘zgaradi?

O‘zbekiston qonunchiligida 2024-yil 1-noyabrdan bir qator o‘zgarish va yangiliklar kuchga kiradi. Quyida ushbu sanadan kuchga kiradigan asosiy o‘zgarishlar taqdim etildi.

Tabiiy gazning ijtimoiy norma miqdori oshiriladi

Noyabr oyining birinchi kunidan tabiiy gazning ijtimoiy norma miqdori 100 metr kubdan 500 metr kubgacha oshiriladi. Ya’ni oylik bazaviy me’yorlar isitish mavsumi uchun mo‘ljallangan shkalaga o‘tadi.

Noyabr, dekabr, yanvar va fevral oylarida bir oylik me’yorlar quyidagi tartibda bo‘ladi:

• 500 m3 gacha — 650 so‘m (1 m3 gaz uchun);
• 501 m3 dan 2500 m3 gacha — 1500 so‘m;
• 2501 m3 dan 5000 m3 gacha — 1950 so‘m;
• 5001 m3 dan 10000 m3 gacha — 2275 so‘m;
• 10001 m3 va undan yuqori — 2600 so‘m.

Xorijda taklif etilayotgan ish o‘rinlari ochiq eʼlon qilinadi

Prezidentning “Xorijda mehnat faoliyatini amalga oshirish jarayonlarini tartibga solish bo‘yicha qo‘shimcha chora-tadbirlar to‘g‘risida”gi qaroriga ko‘ra xorijiy ish beruvchilar tomonidan taklif qilinayotgan ish o‘rinlari haqidagi barcha maʼlumotlar Migratsiya agentligining elektron platformasi, OAV va ijtimoiy tarmoqlarda ochiq eʼlon qilib boriladi.

Bino va inshootlar energiya samaradorligi toifalari joriy etiladi

200 kvadrat metrdan ortiq maydonli bino va inshootlarning energiya samaradorligi toifasini aniqlash uchun quyidagi toifalar joriy etiladi: “A”, “V”, “C”, “D”, “E”, “F” va “G”. Bunda “A” toifasi eng yuqori energiya samaradorligiga ega bino va inshootlarni, mos ravishda “G” toifasi – eng past energiya samaradorligiga ega bo‘lganlarini belgilash uchun qo‘llaniladi.

Aholi turmush farovonligi oshiriladi

Qonunchilikka ko‘ra, “Kambag‘allikdan farovonlik sari” dasturi quyidagilarni nazarda tutuvchi “Kambag‘al oilalar uchun yettita imkoniyat va mas’uliyat” tamoyili asosida amalga oshiriladi: 

• barqaror bandlik va yuqori daromad topishga erishish;
• ta’lim olish va kasb-hunar o‘rganish;
• kafolatlangan davlat tibbiy xizmatidan foydalanish;
• ijtimoiy xizmatlardan foydalanish;
• yashash sharoitlarini yaxshilash;
• davlat tomonidan mahallalar infratuzilmasini rivojlantirish;
• davlat organlari xodimlari bilan to‘g‘ridan-to‘g‘ri muloqot qilish.

Inson hayoti va sog‘lig‘iga yuqori xavf soluvchi omillar reyestri yuritiladi

Qonunchilikka ko‘ra, barcha uchun ochiq holatda yuritiladigan Inson hayoti va sog‘lig‘iga yuqori xavf soluvchi omillar reyestri joriy qilinadi.

Tadbirkorlarga beriladigan kredit 300 mln so‘mgacha oshiriladi

Prezident qaroriga asosan amalga oshirilayotgan “Kichik biznesni uzluksiz qo‘llab-quvvatlash” kompleks dasturi doirasida kichik tadbirkorlik sub’yektlariga ajratiladigan 100 million so‘mgacha garovsiz mikrokreditlarni qayta moliyalashtirish yoki ular bo‘yicha kafilliklar taqdim etish tartibini saqlab qolgan holda tijorat banklariga va mikromoliya tashkilotlariga o‘z resurslari hisobiga mazkur mikrokredit miqdorini 300 million so‘mgacha oshirishga ruxsat etiladi.

Shuningdek, davlat dasturlari asosida kichik va o‘rta tadbirkorlik subyektlarini qo‘llab-quvvatlashga barcha tijorat banklari va mikromoliya tashkilotlari jalb qilinadi.

Ayrim garovsiz mikrokreditlar qayta moliyalashtiriladi

“Kichik biznesni uzluksiz qo‘llab-quvvatlash” kompleks dasturi doirasida 100 million so‘mgacha garovsiz mikrokreditlar, kichik tadbirkorlar ro‘yxatdan o‘tgan va faoliyat yuritayotgan hudud toifasidan kelib chiqqan holda, “Tadbirkorlikni rivojlantirish kompaniyasi” AJ tomonidan mikrokredit beruvchilarga quyidagi stavkalarda qayta moliyalashtiriladi: 

• 5-toifa uchun — 12,5 foiz;
• 4-toifa uchun — 13,5 foiz;
• 3-toifa uchun — 14,5 foiz;
• 2-toifa uchun — 17,0 foiz;
• 1-toifa uchun — 18,0 foiz;

Shuningdek, mikrokreditlarni qayta moliyalashtirishda ular bo‘yicha yuzaga keladigan kredit tavakkalchiligini tumanlar (shaharlar) toifasidan kelib chiqib, kompaniya va mikrokredit beruvchilar o‘rtasida taqsimlash tizimi joriy qilinadi.

Tayyor zargarlik buyumlariga nisbatan import bojxona boji kamaytiriladi

Chet elda ishlab chiqarilgan zargarlik buyumlarini, basharti ular bo‘yicha bojxona to‘lovlari amalga oshirilganligini tasdiqlovchi hujjatlar bo‘lmasa, sotuvga qo‘yish va chakana savdoda realizatsiya qilish man etiladi.

Bunda ushbu tartib buxgalteriya hisobi qonunchiligiga muvofiq 2024 yil 1 sentyabrgacha rasmiylashtirilgan (kirim qilingan) zargarlik buyumlariga nisbatan tatbiq etilmaydi.