O‘zbekiston va Qozog‘iston o‘rtasida iqtisodiy bitim tasdiqlandi

“Markaziy Osiyo” xalqaro sanoat kooperatsiyasi markazi” erkin iqtisodiy zonasini tashkil etish to‘g‘risida”gi prezident qarori qabul qilindi.

Qarorga ko‘ra, “Markaziy Osiyo” xalqaro sanoat kooperatsiyasi markazi erkin iqtisodiy zonasi tashkil etiladi. Markaz faoliyatini boshqarish “Sirdaryo” erkin iqtisodiy zonasi direksiyasi” unitar korxonasiga yuklatiladi.

Markaz hududiga sanoat korxonalarini ishlab chiqarish jarayoniga jalb etish va import o‘rnini bosuvchi mahsulotlar ishlab chiqarishni yo‘lga qo‘yish orqali sanoat kooperatsiyasi kengaytiriladi.

Markaz hududida faqat O‘zbekiston va Qozog‘istonda ishlab chiqarilgan mahsulotlar ishlab chiqarish sertifikati nazorati ostida realizatsiya qilinadi.

Qozog‘iston va u orqali tashrif buyuruvchi chet el fuqarolari uchun markaz hududiga maxsus nazorat o‘tkazish punkti orqali vizasiz tartibda, shaxsni tasdiqlovchi hujjat bilan kirish, 15 kun mobaynida hududda bo‘lish va kirgan nazorat punkti orqali chiqish imkoniyati yo‘lga qo‘yiladi.

7-avgust kuni Shavkat Mirziyoyevning Qozog‘istonga davlat tashrifi arafasida Ostonada Qozog‘iston—O‘zbekiston biznes-forumi bo‘lib o‘tgandi. Unda energetika, geologiya, avtomobilsozlik, elektrotexnika va yengil sanoat, shuningdek, qurilish materiallari va farmatsevtika mahsulotlari ishlab chiqarishda hamkorlik salohiyatini ochishga qaratilgan investitsiya bitimlari va savdo shartnomalari imzolandi.

Forumda Qozog‘iston bosh vaziri o‘rinbosari Serik Jumangarin yangi qo‘shma tashabbuslarni har tomonlama qo‘llab-quvvatlash, o‘zaro manfaatli loyihalarni amalga oshirish uchun imtiyozli shart-sharoitlar yaratish istagini qayd etib, qozoq biznesini noyob imkoniyatlardan unumli foydalanishga va o‘zbekistonlik hamkasblar bilan faolroq hamkorlik qilishga, yangi qo‘shma korxonalar ochish va o‘zaro manfaatli savdo aloqalarini o‘rnatishga chaqirdi.