Fransiya terma jamoasining sobiq yarim himoyachisi Jerom Roten Kilian Mbappeni tanqid ostiga oldi.
Fransiya terma jamoasi Millatlar Ligasi doirasida Isroilni 4:1 hisobida mag‘lub etdi. Mbappe esa bu vaqtda Stokgolmdagi tungi klublardan birida ko‘zga tashlangan.
Kilian jarohatidan to‘liq tuzalmagani sababli, Fransiya termasidan chaqiruv olmagandi.
“Real” dushanba yoki seshanba kuni mashg‘ulotlarga qaytadigan Mbappega Shvetsiyaga ketishi uchun ruxsat bergan. Shuningdek, klub xodimlari La Liga va Chempionlar Ligasi o‘yinlariga tayyorgarlik ko‘rish uchun individual dasturni ham yuborgan.
Hujumchi bo‘sh vaqtidan foydalanib, Stokgolmga qarindoshlarini va “PSJ”dagi jamoadoshi Nordi Mukieleni ko‘rgani tashrif buyurgan.
Roten esa Kilianning Stokgolmdagi “sarguzashtlarini” tanqid qildi.
“Kilian bu narsalar, ayniqsa, Fransiya o‘ynayotgan vaqtda qanday yomon ko‘rinishi tushunmayapti. Ha, unda endi bo‘sh vaqtlar paydo bo‘ldi. Muammo shundaki, u Fransiya terma jamoasini ham bu ishga aralashtirmoqda.
Sen hammaga dam olish, tanaffus kerakligini tushuntirasan, keyin esa Didye Deshamga, butun terma jamoaga, Fransiya xalqiga terma jamoaning o‘yini umuman qiziq emasligini bildirasiz. Fotosuratlar yordamida sen barchasidan ustun ekanligingni ko‘rsatmoqchi bo‘lasan.
Biz seni ko‘tardik, Eyfel minorasidan-da balandroq joylashtirdik va endi sening bunday tasavvur yaratishga, bunday xato qilishga haqqing yo‘q. Bo‘lib o‘tgan voqea Mbappening hamma narsadan, Deshamdan ham yuqori ekanligini ko‘rsatdi. Didye Deshamdan mas’uliyatni o‘z zimmasiga olib, undan sardorlik bog‘ichini olib qo‘yishini so‘rardim”, — deydi Roten.
Izoh (0)