Efiopiya 156 yillik milliy tarix va madaniy yodgorligi — XIX asrda Britaniya mustamlakachi qo‘shinlari tomonidan o‘g‘irlab ketilgan imperator Tevodros II qalqonini qaytarishga erishdi.
1867—1868-yillardagi Angliya—Efiopiya urushi paytida inglizlar Mekdala qal’asini qo‘lga kiritgandan so‘ng qalqonni o‘lja sifatida olib ketishgan.
Efiopiya merosini himoya qilish idorasi bir yildan ortiq vaqtdan beri qalqonni qaytarish uchun kurash olib bordi. Qalqon Nyukasldagi Anderson & Garland auksionlari orqali sotuvga chiqarilgandi. Ammo imperatorning avlodi shahzoda Ermias Sahle Selassie Xaile Selassie aralashuvi tufayli auksion bekor qilindi.
Addis-Abebada osori-atiqani bir vaqtlar inglizlar bilan jang qilgan efiopiyaliklarning avlodlari, shu jumladan, Efiopiya qahramonlari — antik davr vatanparvarlari uyushmasi raisining o‘g‘li va Efiopiyani himoya qilish idorasi bosh direktori Daniel Jote Mesfin kutib oldi.
Ushbu voqea Efiopiyada tarixiy hisoblanadi, chunki qalqon Tevodros II merosining ramzi bo‘lgan milliy merosning muhim qismini ifodalaydi.
Izoh (0)