O‘zbekiston Markaziy banki fuqarolarni onlayn firibgarlikning yangi turidan ogohlantirdi.
Ma’lum qilinishicha, firibgarlar messenjerlar orqali fuqarolarga Markaziy bankning ramziy belgilari tushirilgan soxta hujjatlar yuborib, ularning mobil qurilmalariga zararli ilovalarni o‘rnatishga urinmoqda.
Mazkur soxta hujjatlarda go‘yoki fuqaroning mablag‘lari xavfsizligini ta’minlash uchun “moliyaviy xavfsizlik bo‘yicha mutaxassis” tomonidan ayrim amallar bajarilishi to‘g‘risidagi yolg‘on axborot ko‘rsatilgan.
Bu orqali “mutaxassis” niqobi ostidagi firibgar fuqaroning mobil qurilmasiga zararli ilovani (xususan, “Bezopasnost” nomli) o‘rnatish orqali ushbu qurilmadagi rasm va hujjatlar, SMS-xabarlar va qo‘ng‘iroqlar haqidagi ma’lumotlarni yashirin tarzda qo‘lga kiritadi.
“Yuqoridagi kabi holatlarga duch kelsangiz, firibgarlarning aldovlariga aslo ishonmang, ilovalarni esa messenjerlar orqali emas, balki rasmiy Google Play va App Store do‘konlaridan o‘rnating”, deyiladi Markaziy bank ogohlantirishida.
Markaziy bank avvalroq firibgarlarning internet tarmog‘idan soxta telefon raqamlari orqali fuqarolarga qo‘ng‘iroq qilish holatlari kuzatilayotganini ma’lum qilgandi. Firibgarlar o‘zini Markaziy bank xodimi sifatida tanishtirib, fuqarolarning ishonchiga kirib, uni Telegram’da Markaziy bank nomidan ochilgan soxta qo‘llab-quvvatlash chatga qo‘shishga uringan.
Shu orqali fuqarolarning bank kartalariga oid ma’lumotlarini qo‘lga kiritib, pul mablag‘larini o‘zlashtirgan.
Izoh (0)