Namanganda 1380 nafar haydovchining har biri yil davomida 15 dan ortiq qoidabuzarlik sodir etgan. Bu haqda viloyat IIB Yo‘l harakati xavfsizligi boshqarmasi boshlig‘i Mansur G‘oziyev maʼlum qildi, deya xabar beradi “Daryo” muxbiri Azizbek Abduvaliyev.
Namangan viloyat IIB YHXB axborot xizmati
Ushbu haydovchilar aybi bilan jami 227 ta YTH ro‘y bergan, oqibatda 16 kishi halok bo‘lgan.
“Viloyatdagi yo‘l-transport hodisalarini tahlil qilganda qo‘pol qoidabuzarliklarga ko‘p yo‘l qo‘ygan haydovchilarga alohida eʼtibor beryapmiz. Hisob-kitoblarimizga ko‘ra, Namanganda yil davomida 5 va undan ortiq qoidabuzarlikka yo‘l qo‘ygan 9,5 mingga yaqin haydovchi bor, ulardan 1380 nafarida bu ko‘rsatkich 15 tadan ortadi”, deydi YHXB mutasaddisi.
Namangan viloyat IIB YHXB boshlig‘i podpolkovnik Mansur G‘oziyev
Yo‘l harakati xavfsizligi boshqarmasi vakillari ashaddiy qoidabuzarlar ro‘yxatini yuritish, ularni ish yoki o‘qish joylarida muhokama qilish hamda mavjud imtiyozlardan cheklashni taklif etmoqda. Jumladan, haydovchi ikkinchi bor qoidabuzarlik qilganda jarimaning 75 foizi, uch va undan ortiq marotaba sodir etganda esa 100 foizini to‘lashi taklif etilmoqda.
.jpg?_t=1729426718)
Namangan viloyat IIB YHXB axborot xizmati
Maʼlumot uchun, Namangan viloyatida 2024-yilning 9 oyi davomida 641 ta YTH ro‘y bergan bo‘lib, ular oqibatida 125 kishi halok bo‘lgan va 589 kishi jarohatlangan.
Izoh (0)