Mamlakatda 2024-yil oktyabr oyi uchun pensiya to‘lovlari to‘liq amalga oshirildi. Bu haqda Pensiya jamg‘armasi xabar berdi.
Joriy oyda jami 4,1 million nafar o‘zbekistonlik uchun pensiya mablag‘lari tijorat banklariga moliyalashtirilib berildi. Shundan naqd pulsiz shaklda pensiya oluvchi 3,2 million kishining (79 foiz) pensiyalari bank kartalariga o‘tkazib berilgan.
“Pensiya pullarini naqd shaklda oluvchilarga mablag‘lar 4-oktyabr kunidan grafik asosida, Xalq bankining sayyor kassalari tomonidan yetkazib beriladi”, deyiladi xabarda.
Avvalroq Pensiya jamg‘armasi bo‘lim boshlig‘i Davron Pozilov “Daryo”ga bergan intervyusida bu yil pensiyalarga jami 63 trillion so‘m ajratilishini aytgandi.
“Joriy yil yanvar–avgust oylarida jami pensiya to‘lovlariga 40,2 trillion so‘m yo‘naltirildi. Sentyabrdan pensiyalar miqdori 15 foizga oshirilishi hisobiga yana qo‘shimcha 2,9 trillion so‘m ajratiladi. Mazkur mablag‘ qolgan 23 trillion so‘mga qo‘shilib, yil oxirigacha to‘lab boriladi”, degan jamg‘arma vakili.
Maʼlumot uchun, 2024-yil 1-sentyabrdan pensiya va nafaqalar miqdori 15 foizga oshirildi. Xususan, pensiyani hisoblashning bazaviy miqdori oyiga 428 ming so‘m, yoshga doir eng kam pensiya miqdori oyiga 834 ming so‘m etib belgilandi. Hozirda 2 million 200 ming nafar fuqaro yoshga doir eng kam pensiya miqdoridan yuqori miqdorda pensiya oladi.
Joriy yil 1-sentyabrda Pensiya jamg‘armasidan pensiya oluvchilar soni 4 million 49 ming 567 nafarga yetgani maʼlum qilingandi. Eng ko‘p pensionerlar Farg‘ona viloyatida (478,7 ming kishi), eng kam ko‘rsatkich esa Sirdaryo viloyatida (103,5 ming) qayd etilgan.
Izoh (0)