Toshkentda 26-sentyabr kuni xorijlik me’morlar ishtirokida urban-forum bo‘lib o‘tadi.
Mazkur tadbir yaqin va uzoq xorijdagi dizaynerlar, me’morlar va urbanistlarni o‘ziga jalb qiladigan markazga aylanadi. Spikerlar safida Qozog‘iston, Qirg‘iziston, Tojikiston shaharlaridan me’morlar, Britaniya Qirollik me’morlar instituti tomonidan tuzilgan “Amaliyotdagi 100 nafar ayol me’mor” reytingiga kirgan mutaxassislar, yetakchi developerlik kompaniyalari, dizayn byurolari va tegishli yo‘nalishlar talabalari bor.
Forum nima uchun kerak?
Maqsad — transport infratuzilmasi, ekologik muammolar, uy-joy muammolari, iqtisodiy rivojlanish, shaharlar kelajagini shakllantirish, muloqot, innovatsiyalar va aholi turmush sifatini yaxshilash kabi masalalarni va muammolarni hal qilish bo‘yicha tavsiyalar ishlab chiqish.
Forumni O‘zbekiston yosh me’morlar birlashmasi tashkil etmoqda. Ushbu tadbirni o‘tkazish orqali Toshkentni urbanistikaning dolzarb muammolari atrofida ekspertlar birlashmasining boshlang‘ich nuqtasiga aylantirish g‘oyasi bir yildan ortiq vaqt davomida mutaxassislar doirasida faol muhokama qilingan, so‘ngra tashabbus bosqichma-bosqich soha rivojlanishi uchun qo‘shma amaliy harakatlar rejasiga aylangan.
“Biz, yosh mutaxassislar hamjamiyati sifatida soha muammolarini shunchaki ommaviy axborot vositalari va jamoat tadbirlariga olib chiqishni emas, balki shahar muhitining bir qismiga aylanishni, hamjamiyatimiz salohiyatini ko‘rsatishni va gender tengligi masalalari bo‘yicha o‘xshash qarashli ishtirokchilarni birlashtirmoqchimiz. Sohada hali ham mutlaq patriarxat va kamsitishga oid ko‘plab muammolar mavjud, shuning uchun bu andozani o‘zgartirishimiz muhim”, dedi O‘zbekiston yosh me’morlar birlashmasi rahbari, TataLAB arxitektura studiyasi asoschisi Taxmina Turdialiyeva.
Forumda dizaynerlar va me’morlar tomonidan yaratilgan san’at obyektlari, shuningdek, o‘z shaxsiyatini oshkor qilmaydigan eng mashhur rassomning maxfiy asarlari namoyish etiladi.
“Bunday formatning maqsadi jamiyat muammolarini aks ettirish, ushbu muammoning turli jihatlariga ochiq minbar berish va muloqot orqali mahalliy va O‘zbekistondan tashqaridagi hokimiyat organlariga muhokama uchun taqdim etiladigan yechimlarni ishlab chiqishdir. Bizning mintaqamiz, ya’ni Markaziy Osiyoni nazarda tutyapman, qardosh an’analar va madaniyatlar bilan ham, afsuski, urbanizm muammolari, havo sifati va daraxtlarga zarar yetkazadigan shaharlarning haddan tashqari tez qurilishi bilan ham juda o‘xshash. Biz shaharlar uchun muhim bo‘lgan mavzularni muhokama qilishdan chetda qolmaymiz”, dedi Taxmina Turdialiyeva.
Mustaqil hamjamiyat qarori bilan forumda davlat organlari, xususiy sektor va me’morchilik, qurilish, ekologiya hamda raqamli texnologiyalar sohasidagi mutaxassislarni ochiq muloqotda birlashtirish rejalashtirilmoqda.
Kuchlarni birlashtirish, ayniqsa iqlim o‘zgarishi sharoitida, qurilish va uy-joy muammolarini hal qilish masalalarida eng maqbul yechimlarni topish, shuningdek, mamlakat iqtisodiyoti uchun muhim bo‘lgan ushbu sohada qurilish va xususiy sektorni rivojlantirish bo‘yicha O‘zbekiston davlati, tadbirkorlari va aholisining tabiati va qonuniy manfaatlarini himoya qilishni ta’minlaydigan me’yoriy bazani takomillashtirish bo‘yicha takliflar tayyorlash imkonini beradi.
Urban-forumda shaharga befarq bo‘lmagan har bir kishi qatnashishi mumkin.
Izoh (0)