Ijtimoiy tarmoqlarda ichki ishlar organi xodimiga nisbatan faol qarshilik ko‘rsatilgani aks etgan “Qo‘yliq bozorida IIB xodimi kaltaklandi” nomli video tarqalib, turli muhokamalarga sabab bo‘ldi. Mazkur holat yuzasidan Toshkent shahar IIBB quyidagilarni maʼlum qildi.
“Joriy yilning 19-avgust tungi soat 02.00 larda Bektemir tumanidagi bozor hududida tungi xizmatga jalb qilingan Bektemir tumani IIO FMB PPX inspektori safdor J.Rajabov to‘xtab turish taqiqlangan joyga transport vositasi qo‘yilganligini aniqlagan.
Ushbu transport vositasi boshqa mashinalarning erkin harakatlanishiga xalaqit berganligi sababli J.Rajabov Captiva’ning egasini chaqirtirgan va transport vositasini olib qo‘yishini so‘ragan. Biroq 1990-yilda tug‘ilgan Sh.Abdullayev IIO xodimining qonuniy talabini bajarmasdan, unga faol qarshilik ko‘rsatib, safdor J.Rajabovni urib, tan jarohati yetkazgan”, deyiladi xabarda.
Ma’lum qilinishicha, mazkur holat yuzasidan Bektemir tumani prokuraturasi tomonidan tergovga qadar tekshiruv o‘tkazilmoqda.
“Tekshiruv yakuni bo‘yicha qonuniy qaror qabul qilinishi taʼminlanadi”, deyiladi Toshkent shahar IIBB xabarida.
Joriy yilning fevral oyida Buxoroda mast erkak ichki ishlar xodimini urib, burnini sindirgani xabar qilingandi. Mazkur holat yuzasidan erkakka nisbatan Jinoyat kodeksining 219-moddasi 2-qismi bilan jinoyat ishi qo‘zg‘atilgan.
Izoh (0)