Saida Mirziyoyeva Britaniya muzeyida “Ipak yo‘llari” ko‘rgazmasining tantanali ochilish marosimida qatnashdi

Londondagi Britaniya muzeyida 26-sentyabr kuni Silk Roads (“Ipak yo‘llari”) ko‘rgazmasining tantanali ochilish marosimi bo‘ldi. Unda Prezident yordamchisi Saida Mirziyoyeva qatnashdi.

“Ishonchim komilki, ushbu loyiha Ipak yo‘li tarixi va madaniyatiga qiziquvchilarga ilhom bag‘ishlaydi, xalqlar o‘rtasidagi madaniy aloqalarni mustahkamlash, rivojlantirish yo‘lidagi umumiy saʼy-harakatlarimizni ifoda etadi”, dedi u va ko‘rgazma tantanali ochilish marosimida qatnashish unga katta sharaf ekanini aytdi.

Ko‘rgazmada O‘zbekiston muzeylaridan to‘plangan, boy tarixiy va madaniy merosimizni aks ettiruvchi nodir, qimmatli osori atiqalar — 14 ta eksponat namoyish qilinadi.

Muzeyda namoyish etiladigan eksponatlar V-X asrlar oralig‘ida Ipak yo‘li bo‘ylab harakatlangan insonlar, mahsulot va g‘oyalar madaniy hamda tarixiy aloqalarning rivojlanishiga qanday xizmat qilganini ko‘rsatadi.

Ko‘rgazma 2024-yil 26-sentyabrdan 2025-yil 23-fevralga qadar tashrif buyuruvchilar uchun ochiq bo‘ladi.