“Xalqlar do‘stligi” sanʼat saroyida yangi konsert dasturini taqdim etayotgan “Million” jamoasi sardori Davron Kabulov “Daryo” muxbirining eski tarkibni to‘plash haqidagi savoliga quyidagicha javob berdi.
— Sizga bir sirni ochaman. O‘tgan yili “Million”ning 10 yillik yubiley konsert dasturidan oldin ko‘pchilikka aloqaga chiqib, “Kelinglar gina-kuduratni unutib, jamoaning birinchi yubiley konsertida birga sahnaga chiqaylik. Uning oyoqqa turishida sizlarning ham hissangiz bor, bevosita sizning tanilishingizda “Million”ning o‘rni katta”, dedik. Menimcha, bitta konsert uchun yig‘ilsak, aʼlo ish bo‘lardi. Ammo yig‘ilmadik, menimcha bundan bu yog‘iga ham birga konsert berishimiz kerak emas.
Boisi hafsala pir bo‘lganidan keyin menda eskidan ko‘ra, yangi jamoani oyoqqa qo‘yish xohishi kuchaydi. Bundan tashqari, eski jamoa yig‘ilganida ham odamlarga eski zavqni beradi, deb bilmayman. Tan olish kerak, yosh ulg‘aydi, kimdir semirgan, avvalgidek sahnada harakatlanolmasligi mumkin. Ular avvalgidek sahnada yelib-yugurib rol o‘ynaydigan yoshdan o‘tdi. Hayot to‘xtab qolmaydi, agar yangilik qilinmaganida odamzod hali ham ot aravada yurgan bo‘lardi.
Yangi tarkibdagi yigitlardan ko‘nglim to‘q, ular xalq olqishini olishyapti. Umid qilamanki, ular baʼzi akalarining yo‘l qo‘ygan xatolarini takrorlashmaydi. Shu paytgacha “Million”da chiqqan birorta insonga yomonlikni ravo ko‘rmadik. Ular jamoaga qo‘shilgunga qadar qanday darajada edi-yu, undan ketayotganda nimalarga erishgani haqida o‘ylab ko‘rishsa yaxshi bo‘lardi. Ammo intervyularda har qanday gapni gapirib, dilni xira qilishadi.
Biz isteʼdodini payqab unga yordam berdik, jamoa bilan dunyo kezib, yaxshigina gonorar olishdi. Afsuski, ikkita roli mashhurlikka erishgandan so‘ng har qanday gapni gapirish — ko‘rnamaklikdan boshqa narsa emas. Bu narsa Yaratganga ham yoqmaydi, — deydi Davron Kabulov.
Izoh (0)