Ukrainada 3000 nafardan ortiq mahkum armiyaga kirish uchun ariza topshirgan. Bu haqda “Ukrinform” nashri Ukraina Adliya vazirligi bayonotiga asoslanib, xabar berdi.
Ukraina adliya vaziri o‘rinbosari Yelena Visotskaya ushbu xabarni tasdiqlagan. Mahbuslardan armiyaga kirish haqida talablar kelishi davom etayotgani bildirilgan.
“Hozirgacha 3 ming kishi ariza topshirdi. Biz shunday bo‘lishini oldindan bilgandik. Oldinroq mamlakatimiz rasmiylari mahkumlarni armiyaga olishga ruxsat berish haqida qonun chiqishi ortidan 20 ming nafar hukm o‘tayotganlar safarbarlikka olinishi mumkinligini bildirishgan edi”, — degan Visotskaya.
Ukraina rasmiylari xabar berishicha, mahkumlar armiyaga olinishidan oldin ular bilan o‘z roziligiga ko‘ra shartnoma tuziladi. Jiddiy irsiy va tug‘ma xastaligi borlar, og‘ir jinoyat sodir etganlar armiyaga olinmaydi.
Shartnoma asosida armiyaga olingan mahkumlar majburiy tartibda frontga yuboriladi. Shartnoma bandlarini buzib armiyadan qochishga uringan mahkumlar 5 yildan o‘n yilgacha qamoq jazosiga hukm qilinadi.
Maʼlumot o‘rnida, joriy yilning 17-may kuni Ukraina prezidenti Vladimir Zelenskiy armiya saflariga mamlakatni himoya qilishga tayyor mahkumlarni jalb etish to‘g‘risida qaror qabul qilgan edi. Ushbu tartibga asosan ozodlikka chiqarilganlar sharqiy mudofaa chizig‘iga yuborilishi belgilangan.
Izoh (0)