“Qonun loyihasida eshak go‘shtini isteʼmol uchun ishlatiladigan go‘sht toifasiga kiritish nazarda tutilmagan” — Odiljon Tojiyev

Oliy Majlis Qonunchilik palatasida “Hayvonlarni identifikatsiya qilish, ro‘yxatga olish va kuzatish to‘g‘risida”gi qonun loyihasi birinchi o‘qishda ko‘rib chiqilgani haqida xabar berilgan edi.

Qonun loyihasi bilan jismoniy va yuridik shaxslar tomonidan saqlanadigan (parvarish qilinadigan) va urchitiladigan uy hayvonlari – qoramol, qo‘y va echki, cho‘chqa, ot, eshak, tuya, it, mushukni identifikatsiya qilinishi (vizual yoki elektron birkalarni hamda elektron mikrochiplarni hayvonlarga o‘rnatish) nazarda tutilgan.

Oliy Majlis Qonunchilik palatasi spikeri o‘rinbosari Odiljon Tojiyevning maʼlum qilishicha, qonun loyihasini Qonunchilik palatasining qo‘mitasida, siyosiy partiyalar fraksiyalarida va yalpi majlisida ko‘rib chiqish jarayonida deputatlar tomonidan eshak, it va mushukning identifikatsiya qilinishi asosligi bo‘yicha eʼtirozlar bildirilgan.

“Eʼtirozlar qonun tashabbuskorlari tomonidan qabul qilinib, loyiha birinchi o‘qishda maʼqullangan taqdirda, ikkinchi o‘qishga tayyorlash jarayonida olib tashlanishi qayd etilgan. Qonun loyihasida eshak go‘shtini isteʼmol uchun ishlatiladigan go‘sht toifasiga kiritish nazarda tutilmagan.

Umuman bu qonun “go‘sht isteʼmoli” haqida emas, balki hayvonlarni identifikatsiya qilish, ro‘yxatga olish, kuzatish munosabatlarini tartibga soladi. Matbuot xabarnomasidagi tahririy xato tufayli tushunmovchilik kelib chiqqan”, deb yozadi Odiljon Tojiyev.