O‘zbekiston va AQSH o‘rtasida foydali qazilmalar bo‘yicha hamkorlikni mustahkamlash maqsadida muhim xomashyo sohasida (CRM) o‘zaro anglashuv memorandumi imzolandi. Bu haqda Tog‘-kon sanoati va geologiya vazirligi matbuot xizmati xabar berdi.
Hujjatni 16-sentyabr kuni vazirning birinchi o‘rinbosari Omonullo Nasritdinxodjayev va AQSHning O‘zbekistondagi elchisi Jonatan Henik imzoladi.
Xabarda aytilishicha, 2023-yil sentabrda Nyu-York shahrida yuqori darajada bo‘lib o‘tgan sammitda davlatlar rahbarlari foydali qazilmalar bo‘yicha muloqotni boshlash niyatida ekanligini e’lon qilgandi. Mazkur memorandum AQSH va O‘zbekistonning o‘sha sa’y-harakatlarni ilgari surish, iqtisodiy hamkorlikni mustahkamlash yo‘lidagi dastlabki odimlaridan biri bo‘ldi.
Kelishuvdan ko‘zlangan maqsad mamlakatlar o‘rtasida muhim xomashyo sohasidagi hamkorlik aloqalarini yanada mustahkamlash, boshqa yo‘nalishlardagi aloqalarni ham rivojlantirishdan iborat.
Ushbu hujjat muhim xomashyo sohasida AQSH—O‘zbekiston muloqotining davom etishiga, geologiya qidiruv, qazib olish va yuqori qiymatli mahsulot zanjirini yaratish yo‘lida muhim qadam bo‘lib xizmat qiladi.
Shavkat Mirziyoyev may oyida geologiya sohasidagi vazifalarga bag‘ishlab o‘tkazilgan yig‘ilishda muhim xomashyo — litiy, grafit, indiy, vanadiy, reniyning yangi konlarini o‘zlashtirish muhimligini ta’kidlagandi. Prezident aprel oyida Yevropa Ittifoqi bilan muhim xomashyo sohasida strategik hamkorlik o‘rnatilganini, AQSH va Buyuk Britaniya bilan ham shunday bitim ustida ish olib borilayotganini aytgandi.
Izoh (0)