Iyul oyida jinoyat olamida “qonundagi o‘g‘ri — Baxti Tashkentskiy” nomini olgan 53 yoshli Baxtiyor Qudratullayevga sud hukmi bilan 20 yil muddatga ozodlikdan mahrum etish jazosi tayinlangan edi. Shuningdek, uning o‘g‘illari — Ixtiyor Qudratullayevga 9 yil, Bekzod Zafarovga 11 yil, akasi Shuhrat Qudratullayevga esa 10 yil 6 oyga ozodlikdan mahrum qilish jazosi berildi.
Toshkent shahar sudi matbuot xizmatining “Daryo”ga ma’lum qilishicha, Toshkent shahar sudi jinoyat ishlari bo‘yicha sudlov hay’ati apellyatsiya instansiyasida jinoyat ishlari bo‘yicha Shayxontohur tuman sudining 2024-yil 19-iyuldagi hukmiga ko‘ra, Jinoyat kodeksining 165-moddasi 3-qismi “a,v” bandlari va boshqa moddalari bilan sudlangan Qudratullayev Baxtiyor Zaparovich va boshqalarga oid jinoyat ishini ko‘rish 6-sentyabr kuni boshlangan.
Unda Toshkent shahar prokuraturasi bo‘lim prokurori SH.Shomirzayev ishtirok etmoqda. Apellyatsiya shikoyatini Baxtiyor Qudratullayev va uning o‘g‘illari ham bergan. Sud ishida sudlanuvchilar (8 nafar) va ularning advokatlari hamda 3 nafar manfaatdor shaxslar ishtirok etmoqda.
Keyingi sud ishi 13-sentyabr kuni davom ettiriladi.
2023-yil 3-dekabr kuni esa huquq-tartibot idoralari xodimlari “Baxti Tashkentskiy” laqabi bilan tanilgan Baxtiyor Qudratullayevni qo‘lga olgandi.
Iyun boshlarida bo‘lib o‘tgan sud majlisida Baxtiyor Qudratullayev o‘ziga qo‘yilgan ayblovlarga iqror emasligini bildirgandi. Uch nafar sudlanuvchi qisman, qolganlari esa ayblovlarga iqror emasligini ta’kidlagan. Shuningdek, u O‘zbekistonda “ko‘cha”ni nazorat qilishni unga davlat tashkiloti ishonib topshirganini aytgan edi.
10-iyul kungi sud majlisida prokuror 44 ta epizod bo‘yicha ayblanayotgan “Baxti Tashkentskiy”ga 20 yil ozodlikdan mahrum qilish jazosini tayinlash, shuningdek, Jinoyat kodeksining 34-moddasi (retsidiv jinoyat) 3-qismi “a” bandi bilan o‘ta xavfli retsidivist deb topishni hamda uning o‘g‘illariga nisbatan 11 va 12 yilga ozodlikdan mahrum qilish jazosini so‘ragan edi.
Sud hukmiga ko‘ra, Baxtiyor Qudratullayev Jinoyat kodeksining 104-moddasi 3-qismi “g” bandi, 109-moddasi 2-qismi, 165-moddasi 3-qismi “a”, “v” bandlari, 168-moddasi 4-qismi “v” bandi, 242-moddasi 1-qismi, 243-moddasi va 276-moddasi 2-qismi “a”, “b” bandlarida nazarda tutilgan jinoyatlarni sodir etganlikda aybli deb topilib, unga 20 yil muddatga ozodlikdan mahrum qilish jazosi tayinlandi. Jinoyat kodeksining 34-moddasiga asosan u o‘ta xavfli retsidivist deb topilib, tayinlangan jazoni maxsus tartibli koloniyalarda o‘tash belgilandi. Jinoyat kodeksining 96-moddasiga muvofiq B. Qudratullayevga jazoni o‘tash vaqtida giyohvandlikdan davolanishning majburiy choralari qo‘llanilishi belgilandi. U o‘ta xavfli retsidivist deb topilgan.
Qudratullayev bilan sudlanganlardan biri — 1964-yilda Toshkent viloyatida tug‘ilgan, muqaddam sudlangan Shukurali Qurbonov sud hukmi o‘qilganidan bir kun o‘tib, vafot etgan. Uning vafotiga infarkt sabab bo‘lgani aytilgan.
Izoh (0)