Rossiyaning Kamchatka o‘lkasida Mi-8T vertolyoti halokatga uchrashi oqibatida 22 kishi halok bo‘ldi. Bu haqda favqulodda xizmatlarga tayanib, “RIA Novosti” xabar berdi.
![](/static/2024/09/01/photo_2024-09-01_16-10-41-cHlMlGSO.jpg)
Vertolyot bortida 22 kishi — 19 nafar sayyoh va 3 nafar ekipaj aʼzosi bo‘lgan. Rossiya Favqulodda vaziyatlar vazirligi hozirgacha 17 kishining jasadi topilgani haqida xabar bergan.
Dastlabki ma’lumotlarga ko‘ra, vertolyot halokatidan so‘ng barcha ekipaj a’zolari va yo‘lovchilar halok bo‘lgan, omon qolganlar yo‘q, deya xabar berdi halokat oqibatlarini bartaraf etish shtabi “Interfaks”ga.
Xuddi shunday ma’lumotni “TASS” va “RIA Novosti” ham e’lon qildi. Vertolyot bortida bo‘lgan 22 kishi orasida Rossiya futbol ittifoqining moliyaviy direktori Arseniy Zamyatin va uning rafiqasi Polina ham bor edi. Vertolyot uchuvchining xatosi tufayli aviahalokatga uchragan bo‘lishi mumkin.
Murakkab ob-havo sharoitida uchuvchi xatosi ustuvor versiya sifatida qabul qilinmoqda. Tumanda uchuvchi tepalikni payqamay, uning yonbag‘iriga urilgan bo‘lishi mumkin, deyiladi shtabda.
Texnikaning ishdan chiqishi ehtimolini istisno qilib bo‘lmaydi. Qidiruv operatsiyasi paytida vertolyot qoldiqlari 900 metr balandlikda aniqlangan. Qidiruvlar 31-avgustdan beri davom etmoqda. Aviahalokatni tekshirish bilan Davlatlararo aviatsiya qo‘mitasi va “Rosaviatsiya” shug‘ullanmoqda.
Izoh (0)