Shavkat Mirziyoyev boks bo‘yicha o‘zbek murabbiysi Akmal Hasanov qirg‘izistonlik bokschi Munarbek Seyitbek o‘g‘liga yordam berib, uni musobaqaning finaligacha borishida ko‘maklashgani mintaqadagi do‘stona munosabatning yorqin namunasi bo‘lganini aytdi.
“Ahil qo‘shnichilik tamoyillariga qurilgan siyosatimiz bugun xalqlarimiz yuragiga ko‘chganini ko‘rish, albatta quvonchlidir”, dedi davlatimiz rahbari 28-avgust kuni Ko‘ksaroyda Olimpiya o‘yinlarida ishtirok etgan sportchilar, ularning ota-onalari va murabbiylari bilan uchrashuvda.
Parijdagi Olimpiada o‘yinlarida qirg‘izistonlik bokschiga sekundantlik qilgani uchun Akmal Hasanov “Chingiz Aytmatov” medali bilan taqdirlandi.
“Menga ajoyib bokschi Munarbekni qo‘llab-quvvatlash baxti nasib etganidan xursandman, biz qardosh xalqlar, bir-birimizni qo‘llab-quvvatlashimizni his qilamiz va buni butun dunyoga ko‘rsatish juda muhim. Qirg‘izistonda boks rivojlanmoqda, buni Munarbek timsolida ham ko‘ramiz. Bunday yuksak mukofot va qirg‘iz xalqining e’tirofiga sazovor bo‘lish men uchun katta sharaf”, degan edi Hasanov.
Shavkat Mirziyoyev uchrashuvda sportchilarning ulkan g‘alabalari nafaqat o‘zbek xalqi, balki butun mintaqani ruhlantirib yuborganini qayd etdi. Davlat rahbarining ta’kidlashicha, bunday yutuqlar xalqlarni birdamlikka, har qanday sharoitda ham yelkama-yelka turishga chorlagani qalblarni faxru g‘ururga to‘ldirdi.
Izoh (0)