Fransiyaning “Renn” klubi 18 yoshli hujumchisi Matis Lamburd iyun oyida savdo markazida 51 yoshli ayolni elektr skuter bilan urgani uchun ikki yillik shartli qamoq jazosiga hukm qilindi. Ayol voqeadan olti kun o‘tib vafot etgan. Bu haqda RMC Sport xabar bermoqda.
Manbaga ko‘ra, sud Lamburdning sinov muddati besh yil bo‘lishiga qaror qilgan. Ta’kidlanishicha, futbolchiga fuqarolik da’vosi ham qo‘zg‘atilib, marhum ayolning oilasiga to‘lanadigan tovon puli miqdorini belgilab beradi.
Lamburd tunda Renn shahri markazidagi yo‘lakda harakatlanayotib, soatiga 20 km dan oshiq tezlikda ayolga borib urilgan. Elektr skuter Matisning otasiga tegishli bo‘lgan. Futbolchi beparvolik qilganini tan olib, jabrlanuvchining oilasidan uzr so‘ragan.
Hozirgi paytda Lamburd “Renn”ning asosiy jamoasi o‘yinlarida ishtirok etmadi. O‘tgan mavsumda u barcha musobaqalarda 13 ta o‘yinda qatnashib, to‘rtta gol urgan. Futbolchining klub bilan amaldagi mehnat shartnomasi 2026-yilning yoziga qadar tuzilgan.
Transfermarkt portalida berilgan ma’lumotlarga ko‘ra, futbolchining bozor qiymati 500 ming yevroni tashkil qiladi.
Izoh (0)