Ichki ishlarda pensiyaga chiqish uchun xizmat muddatini 25 yilga uzaytirish haqidagi xabarlar yolg‘on — IIV

Ijtimoiy tarmoqlarda ichki ishlar organlarida pensiyaga chiqish uchun xizmat muddatini 25 yilga uzaytirish mumkinligi haqida xabarlar tarqalmoqda.

IIVning ma’lum qilishicha, amaldagi “Harbiy xizmatchilarning pensiya ta’minoti to‘g‘risida”gi qonun hamda prezidentning 3413-son qaroriga muvofiq, ichki ishlar organlarida xizmat qilayotgan xodimning xizmat muddati kalendar hisobda 20 yilga yetganidan so‘ng, o‘tagan xizmat muddati uchun pensiya olish huquqiga ega bo‘lishi ko‘rsatib o‘tilgan.

Hozirgi kunda ichki ishlar organlari faoliyati bilan bog‘liq bo‘lgan normativ huquqiy hujjatlarga pensiya olish uchun xizmat muddatini 25 yilga uzaytirish bo‘yicha taklif yoki qo‘shimchalar kiritish ko‘zda tutilmagan.

Avvalroq pensiyani hisoblashda nimalar inobatga olinishi tushuntirilgandi. Qonunchilikka ko‘ra, pensiya tayinlashda ish haqi va ish staji asosiy ahamiyatga ega. Xususan, ish haqini hisoblash uchun fuqaro mehnat faoliyatini to‘xtatgan davrigacha bo‘lgan oxirgi 10 yillikdan 5 yillik oylik maoshi inobatga olinadi.

Shuningdek, erkaklar 60 yoshga kirib, ish staji 25 yil bo‘lganda, ayollar 55 yoshdan ish staji 20 yilga yetganda yoshga doir pensiya olish huquqiga ega bo‘ladi.

Pensiya tayinlanishi uchun fuqaroning ijtimoiy sug‘urtalangan holda bajargan ish stajlari kamida 7 yil bo‘lishi kerak. Agar undan kam bo‘lsa, pensiya tayinlash rad etiladi.