Prezident boshchiligida Qoraqalpog‘istonni ijtimoiy-iqtisodiy rivojlantirish yuzasidan o‘tkazilayotgan yig‘ilishda barcha hududlar qatori Qoraqalpog‘istonda ham iqtisodiyotni tez o‘stirishga zamin tug‘diradigan drayver yo‘nalishlarda investitsiya, ish o‘rni, eksportni ko‘paytirishga alohida e’tibor qaratilayotgani ta’kidlandi.
O‘tgan davrda Qoraqalpog‘istonda 1,4 milliard dollar to‘g‘ridan-to‘g‘ri xorijiy investitsiya evaziga 150 ta loyiha ishga tushdi. Tadbirkorlar 12 mingdan 25 mingga, tijorat maydonlari 1,5 million kvadrat metrga ko‘payib, 212 ming odam doimiy ishga joylashdi.
Qoraqalpog‘istonda biznes va investitsiya uchun qulay muhit, daromad topish uchun yangi-yangi imkoniyatlar paydo bo‘ldi.
Masalan, faoliyatini mikroloyihadan boshlagan 13 ming tadbirkor kichik biznesga, yana 351 tasi o‘rta biznesga o‘tdi. Yillik aylanmasi 100 milliard so‘mdan yuqori tadbirkorlar 43 taga yetdi.
Davlat dasturlari doirasida yo‘l, suv, ijtimoiy obyektlar qurilishi va mahalla infratuzilmasiga 11 trillion so‘m ajratildi. Xususan, bog‘cha qamrovi 28 foizdan 84 foizga oshdi. Yangi 21 ta maktab qurildi, yana 243 tasi to‘liq ta’mirlandi.
Ilk marta 700 o‘ringa mo‘ljallangan 17 qavatli IT-Park qurildi. “Bir million dasturchi” loyihasi doirasida ikki yil ichida 40 mingga yaqin qoraqalpog‘istonlik yoshlar o‘qitildi.
Tuman va shaharlarda 74 ta oilaviy shifokorlik punkti, 81 ta poliklinika, 92 ta mahalla tibbiyot punktlari ishga tushdi. To‘rtko‘l, Qo‘ng‘irot va Chimboy tumanlarida qo‘shma shikastlanish va o‘tkir qon-tomir kasalliklari markazlari tashkil etildi. O‘tgan davrda tibbiyot muassasalariga 300 milliard so‘mlik 1,5 mingdan ziyod asbob-uskunalar yetkazildi, yil yakunigacha yana 141 milliard so‘mlik tibbiy anjomlar beriladi.
Yaqin-yaqingacha o‘z uyiga mulk huquqi bo‘lmagani uchun 100 mingdan ortiq aholi qiynalib kelayotgan edi. Bu muammo hal bo‘lib, 27 mingta xonadonda yashovchi fuqarolarning uy-joyiga bo‘lgan mulk huquqi e’tirof etildi.
Qoraqalpog‘istonda Mahallalarni qo‘llab-quvvatlash jamg‘armasi tashkil qilinib, 452 ta mahallaning har biriga 500 million so‘mdan ajratildi.
Osiyo taraqqiyoti bankidan jalb qilingan 274 million dollar hisobidan Buxoro—Nukus—Beynov yo‘nalishidagi 240 kilometr magistral yo‘l yaqin kunlarda ishga tushishi ma’lum qilindi.
Orolbo‘yidagi iqlim sharoitini yaxshilash bo‘yicha ham juda katta dastur boshlangan. So‘nggi yetti yilda Orol dengizining qurigan tubida 1,9 million gektarda o‘rmonzorlar barpo etildi. Natijada, hududning o‘rmon bilan qoplanish darajasi 19 foizdan 35 foizga yetdi.
Ekotizimni yaxshilash, sho‘rlangan, suvsiz muhitda yangi nav va urug‘larni yaratish uchun Orolbo‘yi xalqaro innovatsiya markazi tashkil etildi.
Yaqinda tasdiqlangan qishloq xo‘jaligini iqlimga moslashtirish dasturiga ko‘ra, Orolbo‘yida iqlim o‘zgarishi oqibatini yumshatishga 80 million dollar beriladi.
Izoh (0)