“Дарё”да “Қашқадарёлик 80 ёшли аёл суд ва МИБ ўртасида сарсон бўлмоқда. Фуқарога ноқонуний жарима ёзилган” сарлавҳали мақола эълон қилинганди. Қашқадарё вилоят судлари ахборот хизмати бунга муносабат билдириб, суднинг мазкур буйруғи бекор қилинганини маълум қилди.
Фуқаролик ишлари бўйича Шаҳрисабз туманлараро судига ундирувчи Савдо-саноат палатаси даъво ариза билан мурожаат қилиб, Қашқадарё вилоят ҳудудий бошқармасининг “Янгиобод теххизмат БСТ” МЧЖ манфаатида қарздор Гулчеҳра Жаббаровадан қарздорликни ундиришни сўраган.
Фуқаролик процессуал кодексининг 170-моддаси талабига кўра суд буйруғи низосиз талаблар бўйича суд муҳокамаси ўтказмасдан берилган суд ҳужжатидир. Шунингдек, ушбу кодекснинг 181-моддасида “Қарздор арз қилинган талабга қарши эътирозларини буйруқни берган судга суд буйруғининг кўчирма нусхасини олган кундан эътиборан ўн кунлик муддатда юборишга ҳақли”, деб кўрсатилган.
Ундирувчининг аризаси фуқаролик ишлари бўйича Шаҳрисабз туманлараро суди томонидан 2024 йил 10 май куни қаноатлантирилган ва суд буйруғи чиқарилган. Қарздорликни ундириш ҳақидаги ижро варақаси 2024 йил 19 июнь куни Мажбурий ижро бюросининг Қарши шаҳар бўлимига юборилган, дейилади масъуллар изоҳида.
Таъкидланишича, фуқаролик ишлари бўйича Шаҳрисабз туманлараро судининг 80 ёшли аёлни сарсон қилган буйруғи 2024 йил 7 май куни чиққан.
Фуқаронинг 2024 йил 15 августда берган эътирози кўриб чиқилиб, шу куни эътирози қаноатлантирилган ва фуқаролик ишлари бўйича Шаҳрисабз туманлараро судининг 2024 йил 7 майдаги суд буйруғи бекор қилинган, дейилади вилоят судлари ахборот хизмати берган муносабатда.
Изоҳ (0)