O‘z oilasi davrasida, yurtdoshlari bilan yelkama-yelka olg‘a intilayotgan vatandoshlarimiz bilan bir qatorda, yaqinlaridan olisda, xorijda ilm va rivojni maqsad qilib, har qanday qiyinchiliklarni yengib kelayotgan o‘zbekistonliklar ham juda ko‘p.
“O‘zbekistonlik.Students” loyihasi orzu-maqsadlari izidan borib, chet elda ta’lim olib kelayotgan yoshlarimizning hayotiy hikoyalarini ulashmoqda. Loyihaning navbatdagi sonida yana 2 nafar shijoatli o‘zbekistonlik bilan suhbat o‘tkazilishi belgilangan.
Jumladan, Samarqandda tug‘ilib o‘sgan Mohinur Rahmatullayeva ayni damda George Washington Law School’da 80 foizlik stipendiya asosida ta’lim olmoqda. Dastlab, Buyuk Britaniyadagi Greenwich universitetiga qabul qilingan Mohinur pandemiya sababli bir muddat o‘qishni O‘zbekistonda davom ettirishiga to‘g‘ri kelgan. Bu orada u xalqaro tashkilotlarda va firmalarda amaliyot o‘tab, tajriba oshirgan. Nihoyat, 2023-yildan Mohinur ta’limni yana xorijda davom ettirish imkoniga ega bo‘ldi.
Pedagogika sohasida rivojlanishni maqsad qilgan Shuhrat Tagayev esa Samarqand davlat jahon tillari institutida bakalavr va magistr darajasini tugatgach, hozirda Columbia University Teaching College’da bilim olmoqda. U shunchaki “Amerika orzusi” bilan emas, ta’lim sohasida o‘z so‘zi va o‘z uslubiga ega mutaxassisga aylanishdek maqsadni ko‘zlab AQSHga yo‘l olganlardan.
Uzbekistan’s Club loyihasi mana shunday yoshlarning yutuqlari, ular yengib o‘tayotgan mashaqqatlar, ular intilayotgan natijalar boshqalarga ham kuch va motivatsiya berishi uchun keng ommaga taqdim etib kelinmoqda.
Hozirda loyiha Yoshlar ishlari agentligi tomonidan qo‘llab-quvvatlanadi. Ucell aloqa kompaniyasi, Chevrolet va Uzbekistan Airways milliy aviatashuvchisi esa loyihaning asosiy hamkorlari hisoblanadi.
Izoh (0)